IGC Luangmual tichangtlun dawn

Industrial Growth Centre Luangmual chu tihchangtlun zel tum a ni a, industry ten tha zawka hna an thawh theih nan kawlphetha pekna tihchangtlun tum a ni.
Industry dinna hmunpui Industrial Growth Centre (IGC) Luangmuala kawlphetha pekna tihchangtlun dan tur hi Power & Electricity minister F Rodingliana chuan department hotute nen Inrinni zing khan a hmunah a en a, industry-ten chhumlo chat loa eng an dawn theihnan Luangmual Power Sub-Station atanga a bika eng pekna, ‘dedicated power line’ siam dan tur an ruahman.
Minister hian Luangmual leh Chawnpui Power Sub-Station tlawh nghalin, heng sub-station ten a chawm veng hrang hrang hnena kawlphetha tha zawka pek dan leh sub-station tihchangtlun dan tur a en nghal a ni.
Commerce & Industries minister ni bawk F Rodingliana hian Agriculture minister PC Vanlalruata, adviser to CM pahnih – TBC Lalvenchhunga leh KC Lalmalsawmzauva te nen IGC Luangmuala aieng sawngbawlna hmun buatsaih mek chu an enho a. A hmun siamna tur square metre 2000 a zau hmunhma, site development tih mek chu thlir hoin, chak zawka hmalak dan tur an sawi a; power sang tak mamawh Luangmual Sub-Station atanga lak dan leh transformer bunna tur hmunhma an en. IGC Luangmual ram chhung hmun hrang hranga hmasawnna hna thawh mek leh industry din mek thenkhat an tlawh bawk.
Inrinni vek khan Printing & Stationery minister F Rodingliana hian Printing & Stationery kudam, Luangmual ami chu P&S controller nen an tlawh a; rei tak hman tangkai tawh loha awm department kudam chu hman tangkai dan leh thawmthat dan tur an en a ni.