Kum 83 miin university a\angin doctoral degree graduate

Marie Fowler, kum 83, chua doctoral degree in divinity a dawng ta a, ani hi Howard University atanga zirchhuak upa ber a ni. Marie hian a hmain Maple Springs Baptist Bible College and Saminary atangin bachelor degree leh master degree pahnih a lo nei tawh bawk a, tuna a doctoral degree hi chu amah pawhin a puitlin loh mai a inring hman rum rum niin a sawi.
Marie chuan, “Semester khat bak chu ka kal theih pawh ka inring lo, a chhan chu 1959 atang khan school ka kal leh ta lo. Thil zirthiam theihna ka la nei ang tih pawh ka inring ngam tawh meuh lo,” a ti a, mahse, kum thum chhungin doctoral degree a sual chhuak ta der mai a ni.
Marie chuan, “Tlai luat hi a awm lo tih ka sawi duh. Inhriat vek tur chu kum 83 mi ka ni tawh, chumi awmzia chu, keipawhin ka tih theih chuan engvangin nge in theih loh bik ang?” a ti bawk.
Marie chuan a nu leh pa te chu an hunlaiin ziak leh chhiar thiam phalsak an la ni ve lo ni a sawiin, chu chuan zir zel duhna thinlung a pek phah niin a sawi a, “Ka pa kha ziak leh chhiar kan zirtir ve a, a hming sign dan te kan zirtir a, a hming sign dawna X dah ngawt lo turin kan thiam tir ve a ni,” a ti.
Howard University School of Divinity pawhin Marie Fowler chuan mel lung pawimawh tak a phun niin an tarlang a, “Keini Howard University School of Divinity pawhin kan Doctor of Ministry graduate Dr. Marie A. Fowler, kum 83, Howard University School of Divinity leh Howard University pumpui a graduate thei upa ber hi min lawmpui ve turin kan sawm che u a ni,” an ti ve bawk.