ika virus vanga damlo in damdawi in chhuahsan

Zika virus vanga damlo in damdawi in chhuahsan
Gandhinagar khawpuia damlo pakhat, kum 70 mi chu Zika virus avangin damdawi ina enkawl a nih hnuah dam takin damdawi in a chhuahsan.
Gujarat Health Department chuan ningani khan dam taka damdawi in a chhuahsan thu hi sawiin, Zika virus a kai tih hi damdawi in a chhuahsan hma ni li kaltaa report an dawn thu leh a vei tih an hriatchhuah chauh thu an sawi.
Zika virus hi Aedes thosi atanga kai theih niin, khawsik bakah mit na, ruh na leh vunah thlengin a langchhuak thei nia sawi a ni a, naupai laiin a kai phei chuan naute piansualna thlengin a awm thei niin sawi a ni.
Tuna Gandhinagar damdawi in pakhat atanga chhuahtir tak putar kum 70 mi pawh hian khawsik sang tak leh ruh na a neih nasat avangin October ni 24 khan damdawi inah dah luh a nih thu health department hotute chuan an sawi.
Hetia damdawi ina dah luh a nih hnu hian Zika virus hi a kai nia rinhlelhna a lian hle a, damdawi in lamin an tih nghal theih loh avangin Pune-a National Institute of Virology (NIV)-ah a thisen chu endik tura an thawn thu damdawi in hotute chuan an sawi bawk.