ILP dilna – Online

Mizoram home department chuan Inner Line Permit (ILP) dilna online-a kalpui tawh tur a nih thu leh, hei hi November ni 1, 2024 atanga hman tan a nih tur thu tunhnai khan hriattirna a tichhuak a.
Online kalphung tur tlangpui chu – ILP dilna, sponsor (sponsor-tu) chauhvin a thehlut tur a ni a, portal-ah a in-register tur a ni. ILP fee hi online-a pek a nih hnuah reference number hmangin ILP a download theih ang. Security deposit chu ILP surrender a nih hnuah chauh pek kir a ni ang. ILP holder-te hian engtik hun pawha check theih turin ILP hard copy emaw, a nih loh pawhin soft copy an phone-ah an nei reng tur a ni.
ILP pekchhuah dan system hi Online a ni emaw, offline a ni emaw, a nihna tur anga zawm thlap thlap chuan a him viau tur hi a ni a, mahse thuneitu lam emaw, sponsor lam emaw te hian dan ang thlap thlapa thil tih hi kan peih lo deuh thin niin a lang a; ILP valid tawh lo man chhuah tur an awm reng theih dan atang hian a chiang mai awm e.
ILP pekchhuahnaa mawhphurhna nei sang tak chu ‘sponsor-tu’ a ni, a tih theih awm e. Sponsor-tu hian hnathawk tur a sponsor te hi Mizoram an lo luh atanga Mizorama an awm chhung leh, an tihtur an tih zawh hnua Mizoram an chhuahsan thlengin, an awmna, an hnathhawh engkim a hre vek tura ngaih a ni. Hetiang tak hian sponsor-te hian an mawhphurhna hi hlenchhuak tha se chuan, ILP valid lo manchhuah tur hi an tlem pharh ngei ang.
IT kan hmang tangkai chho zel a, ILP chungchangah pawh hian, computerised vek a nih tawh dawn avangin, ram changkangten ‘Alert System’ an kalpui thin ang hi kalpui ve theih tawh awm tak a ni.
A pawimawh ber chu, sponsor te an ni. Sponsor-ten an tihtur leh an mawhphurhna an hlenchhuah loh a an chunga penalty leklam tur hi thuneitu lamin khauh takin kengkawh se, ILP valid lova khawi lai emawa lo tawm ru thin hi an tlem sawtin a rinawm.
Temporary ILP pawh nei lo, a ruka lo lut hi an awm deuh reng bawk a, hetah hian ramri vengtu leh mipuite hi kan tanrual thiam a pawimawh. Lirthei neituten ILP nei lo an phurha a phurtu chunga penalty leklam theih dan tur te pawh hi awm se, tun ai hian kan felfai zawk ngei ang.