India leh MNF inremna chuan UT atanga state a hrinchhuah bakah inner line permit thleng hian he Peace Accord hrinchhuah hi a ni tiin minister Dr R Lalthangliana chuan a sawi.
Mizoram Upa Pawl Sub-Hqrs Hnahthial General Conference vawi 2-na Hnahthiala neih a hmanpui pahin Hnahthiala State Day hman chu South Tuipui bialtu MLA, minister Dr R Lalthangliana hian a hmanpui a. Kum 20 rambuaia kan awm hnuin, 1986 June 30 khan duhthusam kim lo mah se, India nen inremna neiin UT atangin 1987 February 2-ah state puitlingah hlankai kan ni tih a sawi.
“State Day pian chhan hi MNF movement kal zel, remna leh muanna kan neih atanga nei thei chauh kan ni a, sawrkar tan leh MNF tan chuan ni chhinchhiah tlak, ni ropui leh danglam tak a ni. Mizoram tan hian a hlu bik riau,” a ti.
Peace Accord-a MoU-ah UT inawpna a sawi danglam nasa a, state puitling hringchhuakin MLA bial 40 a hring chhuak a. Delhi tlang atanga min awpna atangin mahni thuneihna min pe tih MNF minister hian sawiin, “Peace Accord khan mahni puala university puitling tak min neihtir a, India ram puma university-ah pawh tunhnaiah Mizoram kan langsar hle. High Court building lian kan sa zo a, kan nei thuai ang, kan ram lei lung leh lei hnuai hauhsakna pawh a ram mite phalna lo chuan central-in ama thu ngawtin thuneihna a nei thei lo a, ILP thleng hian peace accord hrinchhuah a ni. Peace Accord avanga Mizoram kan vanneihna kha thil tam tak a awm a ni,” a ti.
District thar pathum zingah Hnahthial a zim ber a; Khawzawl leh Saitual district chuan MLA constituency 4/5 a huam a, Hnahthial chu MLA bial khat chauh a ni a, khaw lian vak lo tlemte chauh a huamtel a, heti chung hian district dangten an dawn hamthatna an dawng ve zel, tiin Dr R Lalthangliana hian a sawi. Tunhnaiah District Hospital building thar sakna tur, district thar pathum tana cheng vaibelchhe 17 theuh pawh an dawng ve leh dawn tih a sawi a ni.