ILP hmanga inchim…
Home minister-in tun hnai khan Revised Online Inner Line Permit (ILP) Portal Phase-I a hawng a, hei hi ILP chungchanga hmasawnna rahbi thar pawimawh tak a ni. Tunhmaa ILP diltu leh pechhuaktuten buaina an neih thin ang kha he online ILP portal hian a rawn sutkian ngei a rinawm a. Thla tina police lamin ILP nei lo etc. an vai thinah pawh, dan bawhchhia man tur a kiam phah sawt turah beisei ta ila.
Saphovin min awp lai khan kan dinhmun an hriatchian em avangin, hnam changkang zawk leh tam zawk ten min chimral loh nan kum 1873 khan Inner Line Permit hi min lo siamsak daih tawh mai a, kum 150 zet kan lo hmang ta der mai. ILP kha min lo siamsak lo ta se, tuna kan thenawm state thenkhat ang mai hian a ram leilung fate (indigenous) zawk hi a bet zawkah tangin lungawilohna kawngzawh etc. hi kan huaihawt chamchi mai awm e.
Kan thenawm Tripura-ah hian Bengali an luh nasat avangin Tripura state population-a 30% vel chauh hi a ram leilung fa Tripuri an ni a. Mizote hi Sapho khan ILP hian min lo hung lo ta se, Tripura ai hian kan chan hi a chhe zawk lovang tih sawi a har viau ang le.
Hetia ILP hmanga hung kan ni chung pawh hian, khawvel hmasawnna lo thang zel karah mahni chauha khawsak a lo harsa chho zel a, eizawnna leh sumdawnna, sum leh pai zawnna kawngah, loh theih lohva kawng hrang hranga thiamna nei hnathawktu chawkluh kan mamawh a, chumi avang chuan dan dik tak ILP hmanga Mizorama lo lut hnamdang hi a kum telin an pung chho zel a, ILP hmang hian min chim pil tho mai ang tih hlauhawm tak a ni ta.
ILP hmanga lo lut tam zawk daih hi chu a leilung fate thawh theih ve reng si, mahse thawh nachang kan hriat loh avang emaw, thawh thiam ve kan tum loh vang emawa chutiang hna thawk tura kan lakluh (sponsor) te an ni deuh vek awm e. ILP hi pekchhuah duh loh ngawt theih lah a ni awm si lo va, ILP kan pek chhuah reng bawk si chuan, tun atanga kum 50/100 lo awm leh turah hi chuan hnamdang hming hi kan pu nawlh nawlh tawhin a rinawm.
Chuvangin, ILP hmanga inchimralna a thlen loh nan, ILP pekchhuah dan system changkang tak (Online ILP portal) kan siam rual hian ILP hmanga lo lut turte thawh thin ang thawk tura kan lo inbuatsaih sauh sauh hi, ILP hmanga inchim buaina thleng tur ven nan leh, kan dinhmun ngelnghet zawk siam nan a pawimawh dawn hle. ILP hmang hian min chim pil hlauh dah ang e.