ILP pek zaa 60 vel khualzin
Sairang-a rel a luh hnu ah Aizawl district bikah Mizoram Police-in inner line permit an pekchhuah tawha zaa 60 vel chu khualzin tura rawn lut an ni.
Aizawl District Superintendent of Police Zosangliana sawi danin, September 14-a Sairang thleng rel a rawn luh hnu, December 17 thleng khan an huamchhungah police-in ILP 18193 an pe chhuak tawh a; ILP an pek zinga zaa 60 chu tourist ILP a ni a, a bak zaa 40 chu labour hna thawk tura rawn lut an ni. Zurui, ILP nei /la loa rel-a rawn chuang chho ve tawp mi pathum leh kutdawh tum mi 36 chu rel hmang bawk hian an thawnkir tawh tih a sawi.
Aizawl bakah Sairang Rel Station leh a chhehvelah ILP checking neih thin a ni tih a sawi a. Kumin chhungin ILP checking vawi 160 neih tawhin, ILP nei lo/ dik lo taka hmang mi 932 man an ni tawh a, thubuai 77 ziahluh a ni tawh tih a sawi a. ILP nei lo an man hi dan tlawhchhan hmanga sumfai chawitir bakah ILP tinung tura hriattir an ni tih a sawi.
ILP dan bawhchhia hremna hi tuna dan an hman laiah a nat theih loh avangin dan thar duan a ni a, Assembly Session hmasa berah putluha pawm theih tura duan mek a ni tih a sawi a ni.
Lirthei bo, a bikin two wheeler bo an chhuizuinaah, state pawn lam mi nena inthuruala (organised gang)chetna a awm lo niin an hria a, a tam ber chu tualchhung mi, ruihhlo ngai an ni a, two wheeler hi an thiat darh a, a part chu an hralh chhawng leh thin tih a sawi. Police hnena in report chu tam tak hmuh let sak an nei tawh tih a sawi a ni.
Mobile phone bo, police hnena thlen chu CEIR portal hmangin an chhuisak a, tam tak hmuhlet a ni. Aizawl SP chuan kumin chhungin Aizawl district-ah an hmuh let sak tawh chu 745 niin, Aizawl Police Station-in 150, Bawngkawn P/S 318, Vaivakawn P/S 105, Kulikawn P/S 70, Sairang P/S 6, Crime Branch 96 a ni tih a sawi.
Kuminah Aizawl district-a thubuai liantham zingah tualthah thubuai 11 ziahluh a ni a, heng zinga thubuai 10 chu chhuichhuah tawh niin pakhat chhui mek a ni tih SP hian a sawi a. Tanhril-a tualthihna chu chhui mek niin, hma an sawn zel niin an hria a, puanzar theih hunah puanzar a ni dawn tih a sawi a ni.
8 Kuminah, December 17 thleng khan Aizawl district-a police station hrang hrangah thubuai 1764 ziahluh niin heng zinga 1150 chu chhuichhuah tawh a ni a, 1009 chu a hmar bawk felin final report (chargesheet) thehluh a ni tawh. Thubuai 421 chhui mek niin chhui chhuah loh 333 a awm.
8 Heng thubuai avanga pawikhawihtu an man tawh chu 2000 a ni a. Thubuai ziahluh atanga zaa 66 (1176 cases) chu rukruk leh in rawk thubuai a ni.
8 Kumina thubuai ziahluh court-in a chinfel tawh atanga zaa 91.7 ah dan bawhchhetute thiam loh chantir (convict) an ni
8 Aizawl district-ah Bawngkawn Police Station-in thubuai ziahluh an nei tam ber a, kuminah 636 an ziaklut tawh.
8 Kumin chhung hian thih dan pangngai loa thi (unnatural death) case 158 an nei tawh a, mahni intihlum 30, tui tla 12 leh damdawi overdose 36 an ni. Mi 78 dang chu chetsualna hrang hrang leh thih chhan hriatchian loh an ni.