In-date vawikhatna a ei loh chi te

Keini ramah te ngial ngial pawh in-a inlen chilh a, inrim kher lova, khawilai hmun nuam deuhah emaw in-date te kan ching ve ta hle.
In-date vawikhatna hi a pawimawh hle a, nalh thei anga bera lan tum a, eng nge ka sawi ang tiin thu vawrh chhuah tur fin hmel tak tak te kan ngaihtuah lawk pawh a ni thei. Mahse, eitur kan order chiahin chung kan inbuatsaih lawkna zawng zawng chu a ti-bam vek thei niin relationship lama mithiam ten an sawi.
“Ei tur mai a ho z,” i lo ti rilru ngawt ang e, in in-date boruak chu kal fuh tura i duh chuan ei loh chileh ei chi deuh thenkhat a awm chiang a nia.
Grooming and etiquette expert Rukshaha Eisa chuan, “In-date vawikhatna chu coffee dawr velah ni thei se a tawk chauh. Coffee in pahin, seh rep rep tur in ei tel thei a. A vawikhatnaa hmun changkang taka zanriah han tih nghal rup mai chu a fuh lo thei tlat. A bik tak fork leh chemte tih vel hman ngaihna hmunah te hian vawikhat in-date-naah tu mahin thil ei vel nuam an ti ngai lo. Chu ai chuan restaurant casual deuh a fuh zawk. Hmun changkang deuh hi innel deuh hnu atan le,” a ti.
In-date vawikhatnaah chuan thil chi hrang hrang hman ngai chi chu ei loh a fuh ber a, chutiang min ti berh thei ang chi pawh ei loh a fuh. I ei zawnga i kam sir vela kai luai thei ang chi te chu order loh a fuh zawk a, soup order pawh a fuh lo (i lo hawp ri hruih palh ang e, a nih loh pawn i irh uk mai ang). Sandwich leh pizza tih vel pawh a fuh lo, pizza hi ei mawi har zet mai a nia, a fan ang duah duah a, chutiang sandwich pawh lettuce vel ha karah a tan palh a hlauhawm tlat! Hei bakah hian thil rimna chi, a bik takin purunvar leh purunsen tamna lampang ei a fuh lovang.