In hmun leh ram dilna pawm

In hmun leh ram dilna pawm
Ningani khan Champhai Town Land Committee chu an chairman James Lalrinchhana, district collector hovin DC Conference Hall-ah an thu a, May ni 11, 2022 leh vawiin thutkhawm inkara Champhai khawpui huam chhunga House Pass, Periodic Patta leh WRC Periodic Patta dilna lut 509 te chungchang ngaihtuahho niin, dan tlawhchhana zirchianna neih a nih hnuah dilnate hi pawm a ni.
Champhai Town Land Committee thutkhawmah hian Champhai khawpui huam chhunga veng leh khua 15 atanga dilna lut hrang hrang 509; house pass dilna 501, periodic patta dilna 7 leh WRC periodic patta dilna 1 te zirchiana ngaihtuahho a ni a, Land Revenue & Settlement Department zirchianna leh record neihte behchhana Champhai Town Land Committee-in ngun taka dilna lutte a ngaihtuah hnuah dilna lut zawng zawngte chu pawm a ni.
Dilna pahnih, EPIC No. thehluh tawh, fiah tawk lote erawh a thara thehlut leh tura hriattir ni se an ti.
District collector chuan khua leh tuite hmakhua ngaia theihtawp chhuah tura din, Champhai Town Land Committee chu financial year khat chhungin vawi 2 aia tlem lo thutkhawm tura tih a nih thu sawiin, a tul a nih phawt chuan vawi hnih aia tam thutkhawm koh tum a ni, a ti.
Lehkha pawimawh tihfel loh avanga a neituten hma an la thei lo thin chu chinfel thuai a tul thu sawiin, dan anga lehkha pawimawh siam sak chu khua leh tui dik takte chanvo a nih miau avangin ngaih pawimawh tlan a tul thu a sawi.
Inhmun leh ram neihte dan ang taka chhinchhiah chu nakin zela hmasawnna ruhrel siam kawnga pawimawh hmasa leh inruahman lawkna tha tak a nih thu a sawi a, a nihna ang tur leh tangkai taka inhmun leh ramte hman a nih theih nan leh, dan lova hman a nih loh nana tanrual a pawimawh thu a sawi.
He hunah hian Land Committee inkaihhruaina leh hnathawh dan tur sorkarin a duante zirho a ni a, dan lova in hmun leh ram neih a nih loh nana hmalak tul hrang hrangte sawiho niin, khawpui thang zelin a mamawh leh ken telte bakah ram humhalh kawnga pawimawhte sawiho a ni. Mipuite chu chhiah pek ngai pawimawh tur leh leiman tha taka sorkara chhunglut zel thin turin Champhai Town Land Committee chuan a ngen.