Minister-in MZP khawmpui hmanpui

Minister-in MZP khawmpui hmanpui
Nilaini zan khan supply minister K Lalrinliana’n Bungchangphai Community Hall-ah MZP Headquarters Kolasib Conference kharna hun a hmanpui.
MZP chu sorkar kal sual tur venna leh khalh ngiltu hmanraw pawimawh tak a ni tiin a sawi a, MZP din chhan pawimawh tak takte sawiin, zirna tihhmasawn bakah kuthnathawh chawisan chu kan ram intodelhna tur chuan nasa lehzuala kalpui a tul tih a sawi.
Zirna hmanga mahni intundinna tura hnathawh leh a tul apianga intodelh tura kuthnathawh zahpui lo turin kalkhawmte a chah a, ram leh hnam tana MZP an lo penchhuah tawhna chu fakawm a tih thu leh Zofate inpumkhatna tura an hmalaknate chu ropui a tih thu a sawi.
He huna khualzahawm K Laldawngliana, MLA pawhin thu a sawi a, MZP chu zirlaite hamthatna humhalh tura pawl din ni mah se ram leh hnam hmangaihna inzirtirna hmun pawimawh a nih a tul thu a sawi. Ram leh hnam hmelma lian ber chu ruihhlo a nih thu sawiin MZP member-te chu ram hma hun thui tak innghahna an nih angin ruihhlo laka fihlim turin a chah.
C Lalruatdika, MZP Headquarters, Kolasib president chuan MZP chu zirlai intelkhawm pawl a nih angin zirna ngaih pawimawh hmasak a tul thu leh ram leh hnam humhalh leh hmasawnna tura a tul apianga penchhuah chu an din chhan pawimawh a nih thu a sawi.