In nupa nun engtin nge i chhem-alh leh theih ang?

Nupa nuna harsatna tawh chang nei lo hi an awm kher lo vang. A tira kan inkar boruak tek deuh sek sek kha a lo mit tial tial a, a rei hnuah chuan kan inti-phur zo ta meuh lo. Ngaiah kan in nei ta deuh tlat te pawh a ni thei a, kan inkara boruak alh deuh hlep hlep kha a lo dai zo ta te pawh a ni thei e. Mahse, beidawng mai suh, relationship lama mithiam ten nupa kar boruak chhem alh leh thei dan ni a an sawi te kan rawn tarlang e.
1. “Ka hmangaih che” tih hi hrilh nawn fo rawh. Nupa inlaichinnaah hian ‘thu’ hi a pawimawh khawp a nia, a bik takin thu thlum, “Ka hmangaih che,” tih ang chi te hi. I kawppui nen khan chetzia leh tawngka ngeiin in inhmangaih thu kha inhrilh nawn fo rawh u. I tana a pawimawh zia leh i nun tihlimtu a nih dan te kha hrilh thin rawh, chu chuan in inkar boruak dai deuh tawh kha a chhem alh leh thei ngei ang.
2. Bedroom a inchhaih te pawh hi tihfo tur a ni. Bedroom nupa nun hman hmaa inchhaih te hian a boruak a chawi kangin, nunpa nun duhawm leh hlimawm zawk a hmantir thei dawn che u a, in bedroom nupa nun hman dan a hlimawm phawt chuan in inkar boruak chu chhem-alh leh a awl sam sawt dawn a ni.
3. Mita inen te hi tih fo tur a ni. I kawppui nena inawm dun lai te khan a mit en fo rawh a, kan mit a intawn fo hian kan inkar boruak dai tawh chhem-alh lehna kawng thui takin a sial ve thei a ni.
4. Bedroom-ah technology hman chin tawk neih thiam a pawimawh. Smartphone, tablet, laptop leh TV thlengin bedroom-a kan hman leh kan khawih nasat lutuk hian nupa nunah a tha lo zawngin nghawng a nei nasa thei hle a, mut hun tawhah chuan hetiang technology buaipuia rei tak tak men ai chuan nupa a hun thawl neih hian nupa nun a chhem-alh leh thei zawk. Mutpaha Facebook leh WhatsApp check kher te tum lo la.
5. Nupaa zin khawthawn te pawh nupa inkar boruak chhem-alh thar leh nan a tangkai hle. Rei tak zin bo pawh a tul chuang lo, ni hnih khat lek han hawi khawthawn dun a, hun zalen hman dun te a tha a, hmun romantic deuhah te kal dun a tha hle. Kan la kal ngai lohna hmun thar tlawh dun te pawh nupa inkar boruak chhem-alh lehna hmanraw tha tak a ni thei.
6. Nupa nih tawh hnuah pawh in-date fo tur a ni. Romantic dinner ei dun te, park a len dun mai mai te, bazar dun te pawh a tha vek. Kan inneih tawh hnuah inrim laia kan romantic thin ang kha tih tawh loh tur emaw kan ti thin a, hei hian kan inkar boruak a tidai thin. Chuvangin kan inhmangaihna leh kan inkar boruak chhem-alh thar leh nan inneih tawh hnuah pawh inrim thar leh fo hi a pawimawh hle a ni.
7. Thil hotê têah pawh lawm thiam zir rawh. Nupa nih hnuah chuan ngaia inneih te a awl a, kan nitin khawsak leh chetvel dan te pawh ngaiah kan in nei mai thin. Mahse, kan nupa inkar boruak tihthat nan chuan thil hotêah pawh lawm thiam a, kan kawppui te thil tih that te inhriat sak a, inlawmpui thiam te hi boruak chhem-alh leh theihna kawng tha tak a ni.