Independent-a din tum MLA candidate-in manifesto puang

Tuikum Assembly biala political party behchhan loa independent-a din tum C Lalrinmawii chuan MLA nih a tum chhan leh a tih tumte a puang.
Chhiahtlang South village council member ni mek C Lalrinmawii (Amawii) chuan, VC member a nih atangin, MLA bial enkawlna kawngah party behchhan nei MLA-in an bialin, an unit leh block ten bial mipui hmasawnna tur an lo pawh buai dan leh VC-te ai pawha thu zawk an lo nih dan te a hmuhin, party behchhan nei loa, bial mipui tana hma lak duhna chuan a tur chhuak ta tih a sawi.
An bial chhung inkalpawhna kawngpui chhe lutuk leh a thenah chuan hlauhawm lutuk siamthat te, kuthnathawk tamna bial an la nih angin loneitute tan link road siamthat, chhungtin ei leh bar zawnna nghet nei tura ngaihtuah pui, infiamna lama an bial thalaite la neih loh pek tum, hriselna leh zirna lama hmalakna tha tawk lo siamthat te chu a tum langsar zingah a tel tih a sawi.
MLA fund dik leh langtlang taka hman a, mipui sum a nihna anga hman chu a duh tih a sawi a. Bial mipuiin ‘Mipui MLA’ tak tak nei turin a sawm tih a sawi a ni.
Zawhna chhangin ZPM-in candidate tur ni lo, an party-a lut turin an sawm a, a hnar tih a sawi. Bialtu MLA ni mek Er Lalrinawma chu a tana huphurhawm a nih rualin, bial tana a thil tih dik tawk lo vangin mipuiin an hnawl a ring tawh tih Amawii hian a sawi. A hmeichhiat puite chuan an vote vek a ring tih a sawi bawk.