Independent MLA pahnihin Haryana sorkar thlawpna hnukdawk

Lok Sabha inthlan vanglaiin BJP kaihhruai sorkar chu Haryana Assembly-ah minority-ah a tlahniam a. Chu tak chu remchangah lak tumin Congress te chuan Nayab Singh Saini sorkar chu state poll neih hma lawkah paihthlak tumin hma an la zui nghal bawk.
Haryana politics crisis hi Independent MLA pathum ten BJP camp chhuahsana Congress an thlawp tak vang a ni a. MLA’s Sombir Sangwan (Dadri), Randhir Singh Gollen (Pundri) leh Dharampal Gonder (Nilokheri) te chuan Thawhlehni khan Rohtak-ah press meet neiin BJP sorkar an thlawpna an hnuhdawh thu an sawi a. Independent MLA pathum te hi Leader of opposition Congress MLA Bhupinder Singh Hooda leh State Congress chief Udai Bhan ten an tawiawm a ni.
Hooda chuan media mite hnenah, “Sorkar chu a ban a ngai a, President’s rule a awmin inthlan buatsaih nghal a ngai a ni,” tiin a sawi.
Thla hnih lek kaltaa chief minister nihna chelh Saini chuan chhang letin, “Congress ten an duh tihhlawhtlin an tum a. Tute pawhin duhthusam kan nei vek a, Congress te duh chu mipui duh dan nen inzawmna a nei lo, anni chuan an duh chauh an thlurbing” tiin a sawi a. Engtiangin nge BJP tena chet lak zel an tum erawh a sawi lo.
Chutih laiin Haryana Speaker Gian Chand Gupta chuan majority test chu Hooda demand angin tun hnai lawkah neih a ni a, thlaruk a ral leh hma chuan neih leh a tul lo a ti a. Nayab Singh Saini sorkar chuan March thla khan trust vote a paltlang a ni.

JJP Factor
BJP te tana pawi thui zel turin an thawhpui reng thin Jannayak Janta Party (JJP) te chuan Congress thlawp an remti a. JJP leader leh Deputy Chief Minister hlui Dushyant Chautala chuan sorkar chuan mipui rinna a hloh tawh a ti a.
“He sorkar paihthlak tumna kan thlawp ang. Congress te hian paihthlak an tum leh tum loh an tihchian a ngai,” tiin a sawi a. Thla hnih kalta khan BJP leh JJP te chu inthenin JJP te hian MLA 10 lai an nei a ni.

MLA neih dan
Haryana Assembly ah hian MLA seat 90 awmin tunah erawh 88 an awm mek a. Chuvang chuan majority mark nei tur chuan MLA 45 neih a tawk. BJP ten MLA 40 an nei bawk a, Inpedendent MLA paruk awmah pathumin an thlawp a ni. Tichuan MLA 43 an nei ta a, mahse, MLA pahnih an la mamawh ta tho thung a ni.
Congress ten MLA 30 an nei a, Independent MLA pathumin an thlawp ta bawk a. JJP ten an thlawk bawk chuan Congress te chuan MLA 43 an nei thei dawn a. Haryana Lokhit Party te leh INLD MLA pakhat ve ve te chu an pawimawh ta a ni.

Chautala Family Factor
Haryana political crisis thleng mekah tun hmaa state politics a huhang ngah ber thin mahse tun hnaia tlahniam ta em em Chautala clan te enkawl INLD te chu an pawimawh em em thei tlat. Tun dinhmunah INLD general secretary Abhay Chautala chu an MLA neihchhun a ni mek a. Dushyant Chautala hi Chautala nephew niin mahse inlahrang a ni a, Dushyant Chautala chuan Congress a thlawp tur thu a sawi chiang tawh a, Abhay Chautala hian a zawm ve dawn nge BJP a zawm zawk dawn tih chu zawhna pawimawh tak a ni.