India-ah Mizoram IMR hniam ber

Nau piang hlim atanga kum khat hnuailam thihna, infant mortality rate-ah Mizoram chu kum hnih chhung India rama hniam ber a ni tawh a, thil lawmawm leh chhinchhiah thlak tak a ni tih NITI Aayog member Dr Vinod K Paul chuan a sawi.
Planning Commission aia din tak, National Institute for Transforming India (NITI) Aayog hotute hian Mizoram an rawn tlawh a. Nilaini khan Zoram Medical College & Hospital Falkawn an tlawh bakah chief minister hoin council of minister-te leh Mizoram sawrkar department hotulu te nen an inkawm a ni.
Mizoram sawrkar hotute nen an inkawmnaah NITI Aayog member Dr VK Paul chuan, ram hmasawnna nghet neia Viksit Bharat 2047 tihlawhtling turin, ngaihtuahna thar (new idea) ngaihlu chungin hma an la tih a sawi a. Hmachhawp fel tak leh tum fel tak neiin ke an pen mek tih sawiin, “Kan zaa thlen kan duh hmasawnna tluantling neih kan tum tlat a ni. Mizoram hi kum hnih chhung India rama Infant Mortality Rate hniam ber (3 per 1000 livebirths) a ni ta hi thil lawmawm leh hmasawnna chhinchhiah tlak a ni,” a ti. State hotuten rawtna leh ngenna an thlen chu a theih ang anga a lo bawhzui tur thu a sawi a ni.
Chief minister Lalduhoma chuan NITI Aayog-in an rawn tlawh hian rah tha tak a chhuah ngei a ring tih a sawi a. Mizoram sawrkarin Handholding Scheme a kalpui dan leh healthcare lama a hmachhawp a lo hrilh a ni.
NITI Aayog official-ten hma an lakna an sawifiah a. State Support Missions an kalpui dan, digital transformation lama hmalakna, aspirational district kalpui dan, Data Analytical Unit leh Atal Innovation Mission kalpui dan, hemi lama state leh UT an thawhpuina, State Innovation Missions chungchang, skills & women empowerment-a hmalakna, health & nutrition-a hma an lakna leh thildang an sawifiah a. Mizorama hmalak dan tur rawtna an neih pawh an sawi a ni.
Planning & Programme Implementation secretary Lalmalsawma Pachuau chuan sustainable development leh Viksit Bharat 2047 thlentir tuma Mizoram sawrkar hmalakna a sawifiah a, sawiho zui a ni.
ZMCH-ah hian NITI Aayog Team hi Health minister Lalrinpuii hoin ZMCH hotuten an lo dawngsawng a. ZMCH director Dr John Zohmingthanga’n an medical college chanchin, hmalakna leh mamawh hrang hrang a sawi a. NHM mission director Dr Eric Zomawia’n Mizoram health sector chungchanga pawimawh hrang hrang a sawi hnu ah inkawmho a ni.
Primary healthcare a ngaihpawimawh thu leh ti changtlung tura Health & FW department hmalaknaah a tul anga puih a inhuam tih Dr VK Paul hian a sawi a. Civil Hospital Aizawl administrative block leh laboratory block bakah Serchhip District Hospital sakna tur DoNER ministry-a dilpui a inhuam tih a sawi.
ZMCH-a post graduate course tan tura hma lak mek chu bawhzui sak a tum thu a sawi a. Critical Care Block sak tan mek tihchangtlun chungchang, hospital leh academic tichangtlung tura hmalak mekna pawh sawihoin, hma lakpui a tum thu a sawi a ni.