India-ah rangkachak tawlh luh a pung

Sakhaw hunpui a intan dawn lai mekin sorkar leh industry thuneitute chuan a man sang leh lak luhna harsatna karah India-a rangkachak tawlh luh a pung hle tih an sawi.
Khawvela rangkachak la luttu tam ber pahnihna, India-ah hian nikuma sorkarin lak luhna chhiah 15% a lak thin 6%-a a tihhniam hnuah nasa takin tawlh luh hi a tlahniam.
Hetih lai hian Customs leh Directorate of Revenue Intelligence (DRI) thuneitute chuan tun hnaiah tawlh ruk a tam thar hle tih an sawi a, Indian thlawhna tumhmunah man pawh an nei nual niin an sawi.
Chennai-a rangkachaka sumdawng pakhat chuan India-a a ruka rangkachak lak luh hi hun a hehin a hlauhawm em em a; mahse, sakhaw hunpuiah duhtu an tam si a, a tawlh thinte tlemte chuan hun tlem an neih chu tangkai taka hman tumin hma an la nasa niin a sawi ve bawk.
Indian-te hian tun thlaah Dhanteras leh Diwali an hmang dawn a, hetih hun laia rangkachak an lei nasat lai niin thil hlu dang pawh a hralh a kal ber hun lai a ni.
Ningani kha India-a rangkachak man a to lai ber niin gram 10-a rit chu Rs. 1,28,395 man a ni a, kumin chhungin a man hi 67% zetin a pung tawh.
Hetiang a nih chuan kg khat man chu lak luhna chhiah 6% leh tual chhunga sales tax 3% chawi nen Rs. maktaduai 1.15 chuang man a ni dawn tihna a ni.
“Rangkachak man a san mek zel laiin a tawlhtute hian hlawm lianin an ti nasa a. A hralhna a that miau avangin an tan pawh thlemna hautak tak a tling a ni,” tiin Mumbai-a sumdawng pakhat, a hming sawi lan duh loh chuan a sawi.
July thla khan lak luhna chhiah paih hnuah tawlh luh kg khat hi Rs. 6,30,000 manah a tla hman a. Tunah erawh chuan lak luh a khirh a, a tha chi duhna a sang bawk si a, a man hi a to ta em em niin sumdawng dang pakhat chuan a sawi.
2024-25 chhung khan sorkar agency-ten rangkachak tawlh thubuai 3,005 an ziak lut a, metric ton 2.6 an man bawk.