India-Bangladesh ramri vengtute hnenah hmanraw tha pe
India-Bangladesh ramri vengtute hnenah hmanraw tha pe
India-Bangladesh ramri vengtu, Border Security Force (BSF) sipaiten an hnathawhnaa thil thleng leh dan lova India-a Bangladeshi luh tum an man leh thawn te, an laka pawikhawihna thlengte an record theih nan taksaa belh mai thei camera 5,000 chuang an dawng.
Venhim hna thawhnaa mi pawimawh chuan km 4,086 vengtute outpost eng emaw zatah dan lova India-a Bangladeshi lutte finger print leh iris scan an tiha Foreigners Registration Office-a an thawnna tur hmanrua chhawp a ni tih a sawi bawk.
Hetianga BSF-te thuam chak hi August 5, 2025-a Bangladesh-a Sheikh Hasina-i sorkar a tluk hnua ramri venna tihchak tura hmalakna a ni.
Bangladesh nena inrina venhimna dinhmun an ennawn a nih hnuah BSF headquarters chuan union home ministry nenah heng hmanrua neihsak tura rawtna hi thlenin pawmsak an ni.
Ramria duty sipaite hnenah hian an thawmhnawa tar theih thlalakna 5,000 chuang hi thawh hnihin thawn a ni a. Heng thlalaknate hi zanah pawh fiah taka thla la thei niin darkar 12-14 chhung record thei a ni.
Thlalaknate hi BSF sipaiten Bangladeshi luh rute an thawn haw lai leh ramria dan bawhchhiatna thil – ruihhlo, ran leh Indian pawisa tawlh an man te, mihring hmanga sumdawnna leh thil pawi dang thleng lak nan a tangkai thei dawn a ni.
Ram pahniha mi sualten BSF sipaite laka tharum an thawhna a thlen pawhin finfiahna atana hman theih a ni dawn a ni.
BSF outpost thlan bik leh boruak tha lo thlen mai theihna bikah ramri kân apiang chhinchhiahna, biometrics data recording machine chhawp niin hetah hian an kutzia leh mit thla lak zel a ni dawn a ni.
Biometric data hi FRO-ah thawnin Bangladesh atanga dan lova India-a lut ru leh pawi khawihtute hriat nan a tangkai thei dawn nia sawi a ni.
Union home ministry chuan April thlaa Pahalgam-a mi firfiakten pawi an khawih hnuah Bangladesh nena inrinaa awm state-te chu dap chhuaka thawn haw zel turin a ti.
Sorkarin a chhinchhiah dan chuan BSF hian July 15 thleng khan dan lova India-a lut Bangladeshi 1,372 man tawhin state police-ten 3,536 an man tawh bawk.
Nikum khan BSF hian mi 2,425 manin police-in 1,049 an man bawk.
Nikum khan India leh Bangladesh-ah ramri vengtu sipai beihna vawi 77 a thleng a, kuminah hian vawi 35 a thleng tawh bawk tih sorkar chuan a chhinchhiah.