Israel-in Lebanon chhim lam a kahnaah mi 12 vel thi
Israeli-ten boruak atanga Lebanon chhim lama khua an beihnaah mi 12 vel an thi niin Lebanese health ministry-in a sawi.
Pathianni zana Kfar Roummane khua an kahnaah naupang pahnih leh hmeichhe pahnih telin mi 11 an thi a. An kah nawn lehnaah lirtheia chuang damdawi ina thawk a thi bawk.
Israeli sipaite chuan an luah china an sipaite drone hmanga beihna chhan let nan Shia Muslim hel pawl, Hezbollah hmun an kah thu leh ‘mi firfiak eng emaw zatin’ ralthuam an phur kual niin an sawi.
Lebanon chhim lamah hian Israeli-te beihna avangin ni thum liam ta chhungin mi 27 vel an thi niin health ministry chuan a sawi.
Lebanese President Joseph Aoun-a chuan ‘hlauhawm taka boruak tihsosanna’ chuan June-a US ruahman anga inkahhai, Israel leh Hezbollah inbeih tawp phahna chu a tiderthawng tih a sawi a. Ram dangte chu Israel khap turin a ngen.
Israeli sipaite hian tun hnaiah Lebanon chhim lam hi a bei nasa hle a. An luahsak ram bul hnaiah che nasa zualin mi cheng eng emaw zat an tlanchhiat phah.
Kfar Roummane pawh hi Nabatieh district-a mi niin ‘security zone’ tia Israeli sipaite sawi atanga hla lo tak a ni.
An beih hmasakah hian Shuyuiya khaw bula mi chenna chhawng thuma sang chu zan lai belh hretah an kap niin Lebanon-a sorkar enkawl National News Agency chuan a tar lang.
Lebanese health ministry chuan mi 11 thi bakah hian mi pariatin hliam an tuar a, heng zingah hian naupang pathum leh Hezbollah nena inzawm emergency service, Islamic Health Association-a thawk a tel.
A vawi hnihna hian Islamic Risala Scout Association, lirtheia damdawi thiamte chuang lai fuhin mi pahnihin hliam an tuar niin ministry chuan a sawi a. Risala Scouts hi emergency service niin Shia pawl, Amal movement hnuaia mi niin Hezbollah nena thawkho, an ni.
Israel Defense Forces (IDF) chuan ‘Lebanon chhim lamah Hezbollah firfiak hmunhma eng emaw zat an kap chhia’ tih an sawi a. A hmain Ali al-Taher ridge-a Israeli sipaite awmna, Kfar Roummane chhim lama mi leh ‘security zone’ an tihah drone pahnih a puak hmasa a, an chhang let tih an sawi.
“IDF hian mi firfiak eng emaw zat, Kfar Roummane chhehvela IDF sipaite tana hlauhawm siamna tura ralthuam phurtute an kap leh bawk,” an ti.