India camp-ah Chhetri inpulut tawh

India camp-ah Chhetri inpulut tawh
A khelhna club lamin India camp zawm tura an chhuah duh lawk loh hnuah ram tana inkhelh bansan zet tawh hnua national team mamawhna avanga inlamlet leh mek Sunil Chhetri chu tunkar tir lam khan Bengaluru khawpuia Singapore machhawn tur India team inkulhnaah a inpulut fel.
Chhetri rual hian a Bengaluru FC team-mate pahnih Rahul Bheke leh Roshan Singh Naorem-te paw’n India camp hi an zawm fel ve nghal a, anni pathum an luh leh tak hnuah India camp-a player training mek zat chu 28 an tling chho ta a ni.
Tarlan tawh thin angin, Asian Cup qualifying round match pawimawh zet zet pahnihah India hian Singapore an hmachhawn dawn a; match hmasa zawk hi October ni 9 (away) niin, October ni 14 (home)-ah an intawng nawn leh ang.
Singapore hmachhawn tur hian head coach Khalid Jamil chuan la thlitfim leh turin player 30 a ko phawt a, mahse, Indian club pathumin player 14 lai an chhuahtir duh loh avangin thla hlui liamta September ni 20-a India inbuatsaihna camp an tan khan player 18 chiah an in report a, club lamin an chhuahtir duh loh zingah hian India striker rangkachak Chhetri pawh a tel ve a ni.
Club lamin national camp zawm tura an chhuahtir duh loh zinga player pasarihte chu Bengaluru FC player-te an ni a; pathum dang chu East Bengal chhawr lai niin, Punjab FC lamin player pali an dangbet ve bawk.
Club pathumte hian September thla tawp lama an player-te an chhuahtiur tur thu an sawi angin Sunil Chhetri, Rahul Bheke leh Roshan Singh Naorem-te’n national training camp an zawm thu hi All India Football Federation (AIFF) chuan ‘X’ kaltlangin an tarlang.
Anni pathum hian camp an zawm tlai viau mai a, October 9 match khel tura Indian team-in Singapore an pan hma ni tlemte awm tawhah club lamin an chhuahtir ve chauh a ni!
Anni pathum bakah hian a hun taka national camp zawm hman lo, a hnua inpulut ve dangte chu: Farukh Choudhary, Gurpreet Singh Sandhu, Rahim Ali, Muhammed Uvais, Pramveer, Nikhil Prabhu, Muhammed Suhail, Anwar Ali leh Mahesh Singh Naorem-te an ni.
Jamil hian Indian club-te chu a player thlanchhuahte national amp lama chhuahtir turin a nawr reng a; AIFF pawh an harsatna sutkian dan kawng ngaihtuah turin a kar na hle a, club leh national team-a player-te’n rual tlang zawka an theihna an hmanchhuah theih dan tur kawng dap chhuak turin Indian football thuneitu sang ber hi a phut a ni.
Dan ding laiah chuan Fifa pawmpuia international match khelh runpui (FIFA international match window) lai a nih loh chuan club-te’n an duh chuan an player-te ram tana inkhel tur an dangbet thei tih a ni a; FIFA international match window hnaivai ber hi October 6-14, 2025 chhunga ni a, he tih lai hi chuan eng club mahin national team-a in report tura coach-te thlan chu an hnial ngawt thiang lo a, mahse, Jamil hian Singapore hmachhawn tura inbuatsaihna hun rei zawk neih a duh avangin national camp luh hun a tihma a, hei hi FIFA dan piahlam deuh a nih avangin club pathumin an doidal ngam ta a, Chhetri pawhin national camp a zawm tlai chhan kha a ni.
Kum 48-a upa Aizawl FC boss hlui Jamil hian tuntuma Singapore hmachhawn tur squad a thlanchhuahah hian AFC Champions League Two campaign lama inlan ngai Mohun Bagan Super Giant leh FC Goa player-te chu a ko tel ve ta lo a ni.
Mohun Bagan SG hi September ni 30 khan Sepahan SC hmachhawna Iran rama inkhel tur an nih lain an foreign player paruk ngawtte chuan an ram theuhte thurawn angin Iran rama zin an duh ta lo a, Bagan pawhin ACL2 match khelh loh mai an titlu ta a ni.
October ni 1, 2025 khan FC Goa chuan Tajikistan ramah mualneitu FC Istiklol an luhkhung a, sihnih faiin an tlawm.