India hmabak khaw lum uchuak: IPCC

Ramchhung hmun tam takah ruahsur nasa hle mah se, khawlumin kian zai a rel thei dawn chuang lo nia sawi a ni a, India chuan khawlum uchuak tak a hmachhawn chho dawn nia sawi a ni.
Kum 2015 khan India chu khaw lum rapthlak takin a chim a, mi 2500 velin nunna an chân phah a. Hetiang deuh hi India hmaah a inchhawp leh mek niin Intergovernmental Panel on Climate (IPCC) chuan a sawi. Tun ang renga khawvel khaw lum dan hi a than zel chuan India hmabak hi a ko lo hle tih an sawi a. Kum 2050-ah chuan khawvel chuan 2 degree Celsius velin khawvel hi tun aiin a lum belh tawh dawn a, hei hi a tuar nasa ber tur chu mihring tamna ram, India a ni a. Gross Domestic Product pawh 2.8% chauh a ni tawh ang a, chuan chuan a mi cheng chanve dawn khawsak phung hi tun aia hniamah a hung dawn niin an sawi lawk bawk.
IPCC chuan an report-ah hian tun ang zela khawvel lum lam hi a thang a nih chuan nakin lawka tuartu tur an tam hle tih an sawi a. A bikin Pakistan leh India chu a tuar nasa zual tur an ni tih an sawi a, he khawlum hian mihringin awlsam taka a kai theih natna hri a tidarh chak dawn niin an sawi a, hei hi thil pawi tak tur a ni.
An sawi zel dan chuan kum 2050-a 2 degree C-a khawvela lum hunah chuan khawpui lian, mihring chen tamnaah an tuar na zual dawn a, thihna a thlen nasa dawn hle niin an ngai. Khawlum avangin mi an zuaiin hna thawk thei an tam dawn lo va, a thawktu ber mihring thi an tam dawn bawk avangin retheihna a pung dawn niin an ngai bawk.