Mizorama rubber chin theihna hmun zawng zawngah chin tum

A hawnnaah hian Mission bultanna tur RIDF XXX atanga cheng vaibelchhe 27.98 sanction-na lehkha chu chief minister hnenah NABARD Regional Office Mizoram general manager Pankaja Borah chuan a hlan a. He sum hmang hian district 7-a zau 24-ah bul tan tur a ni. Tunhmain loneitute hnenah thlai chin tur kawhhmuh ni mah se, thlai kawhhmuh a lo fuh tawk lo fo avangin an beidawng thin tih chief minister hian a sawi a. Hmalakna tam tak kalpui tawh thin mah se, kan ram enin hmun zau tak tak a la awl duai tih a sawi. “Heng ram ruak, rubber chin theihna hmunah hian khuarei daih, a hralhna lama harsatna awm ve lo rubber ching vek mai ila, a ching duh apiang chintir bawk ila. Kan la thatpui tur a ni. Thlai tam tak kan ching thlawn tawh thin a, rubber hi chu kan ching thlawn loang,” a ti.
Tuna Mizorama kuthnathawktu tui tak tak ho chu kum upa tawh lam, pensioner an ni fur tih sawiin, thalaiten kuthnathawh rawn tui se, thapui thawhin bei se an duh tih a sawi bawk.
Land Resources, Soil & Water Conservation minister Lalthansanga chuan he Mission hi chief minister leh Rubber Board of India chairman Dr Sawar Dhanania ngaihtuah chhuah a ni tih a sawi a. Mizoramin bung thar an kaina tur hmalakna niin, department lam an inbuatsaih nasa a, an phur hle tih a sawi.
LRS&WC secretary Lalsangliana sawi danin, Mission hian Governing Board a nei anga, thuneitu sang ber a ni ang. A hnuaiah Steering Committee a awm anga, an kaihhruaina hnuaiah nodal department LRS&WC chuan district tina bawrhsap-te nen thawkhoin hna an thawk dawn a ni. Fund hi NEC, NABARD, EAP, Ministry of Minority Affairs, CSR leh a remchang apiang an dap ang. Kumtin hectare 1000 zel target siamin chhungkaw 1000 an tuam anga, 2025- 2026 sawrkar kum atanga bul tanin, kum li chhung atan an kalpui phawt ang. An hmalakna hi zau (cluster) ang zela kalpui tur a ni.
Mizoram-in rubber chin theihna ram hectare 37000 aia zau hret a nei a, hectare 6700 velah chin tawh niin, chin tawh zawng zawng hmun thuma thena hmun khat vel an hnai theih tawh a, kumtin metric ton 1460 vel tharchhuah mek a ni. Tuna Mizorama rubber ngah ber chu Er CL Thangliana a ni a, kung 40000 chuang neiin thla khatah cheng nuai 21 vel a lalut mek nia sawi a ni.