Australian coach Graham Reid-a chu April 2019 khan India men’s hockey chief coach atan sengluh niin, Tokyo Olympics 2021-ah khan a team enkawl chu bronze medal a lakpui a, fak a hlawh viau laiin India leilunga mipa hockey world cup khelh zawh takah khan a thlengtu ram chuan quarter-final thleng zo loin pakuana an ni pha chauh a, tournament zawh tuk Thawhtanni khan kum 58 mi hian Hockey India president Dilip Tirkey hnenah banna a thehlut.
-- Advertisement --
Inremna an ziah dan chuan nakuma Paris Olympics thleng hi India team enkawl tur a nih laiin ban a thlang ta zawk a, inthlahna thu a sawiah, “Tun hi ka tan kalkian hun a ni a, management thar kuta mawhphurhna hlan hun a ni.
“He team ka enkawl thei leh Hockey India ka thawhpui thei hi ka tan chawimawina leh hamthatna a ni a, kha zinkawng pumpui kha ka hlimpui a, team tan ka duhsakna sang ber ka hlan e.”
Last eight lut zo loa India a tlak hnu khan HI chief Tirkey leh secretary general Bholanath Singh-te chuan team sulhnu leh an rusum thlak dan thlirletpui turin player leh support staff-te an hmu a, sawihona an neih hnu lawkah Reid hian banna a thehlut zui ta a ni.
Chief coach bakah hian analytical coach Greg Clark leh scientific advisor Mitchell David Pemberton-te paw’n Thawhtanni zing khan banna an thehlut ve nghal bawk a; an pathum hian an chawlh tak tak hmain thlakhat chhung an mawhphurhna ngai an hmui rih ang.
Tirkey chuan banna lehkha an dawn pathumte chu pawmsak vek an nih thu sawi chungin ram tana an hnathawhte chu hriat reng a nih tawh tur thu a sawi a; Olympic Games tela result duhawm tak tak neihpuitu Graham Reid leh a support staff team lakah India chuan lawmna tur a neih reng tawh tur thu a sawi.
Reid-a sulhnu
Australian coach Reid-a hnuaiah hian India chuan hlawhtlinna a chang nual a, chu’ng zinga langsar ber chu India-in kum 41 a nghah hnua Olympic medal a awrh leh tum (Tokyo Olympics 2021) kha niin, nikum Birmingham Common-wealth Games-ah khan final-ah chak zo loin silver medal an dawng a; 2021-22 FIH Hockey Pro League season-ah pathumna an ni bawk.
Reid-a ho tho hian kum 2019 khan India kutah FIH Series Final title a lut a; khami kum vek khan India team chuan Bhubaneswar-a qualifiers hnehna changin nikum Tokyo Games panna ticket an hlawhchhuak.
Reid thlavang hauhtu pahnih
Australian coach ban hun hi fuh lo titu an awm a, an zinga pakhat chu India captain hlui leh national selector pawh ni tawh Sardar Singh kha niin, “Kumin-ah Asian Games kan khel dawn a, nakum maiah Olympic a lo ni leh a, Reid-a ban hun hi a fuh lo. Hockey India lamin Reid-a banna an pawm theih mai chhan tur awm-ang hi ka hre lo.
“Tunah chuan Hockey India chet lak dan tur kan thlir dawn a, coach bang ta aia tha zawk leh kan chimchin tisang theitu tur senglut turin rilru an seng em ang chu,” a ti.
India midfielder tha ni thin hian tun world cup-a India chetchhiat chhanah player-te pawhin mawhphurhna an neih thu sawi chungin, “Coach-te hi player-te ang bawka tha an ni a, an hna ber chu training pek leh game khelh dan tura ruahmanna (strategy) siam a ni. Ruahmanna ang taka khelmual chhunga khelh chhuah erawh player-te mawh-phurhna a ni ve thung,” tiin coach-te thlavang a hauh tlat.
India kuta mipa hockey world cup gold medal a luh vawikhatna 1975 World Cup (Kuala Lumpur)-a India captain Ajit Pal pawhin tuntum tournament-a a thlengtu ram chetchhiat chhanah khan coach ngawr ngawr kawk loin selector rual lam pawh dem tur an nih thu a sawi ve bawk.
“Tun world cup-ah khan kan nau-pangte kha an chauh hmel tlat a, hah rimtawng an ang a; nikum Olympic-a medal awrh team-te kha eng aiah nge an han siksawi chiam kher lem? Kei chuan a tulna ka hre lo a, captain thlak a ngaihna pawh ka hre lo,” a ti.
Coach ban a common!
Tournament liana chetchhiat hnua coach thlakkual hi Indian hockey-ah thil thar a ni lo. KPS Gill hun laia Indian Hockey Federation tih a nih lai pawh khan inbanna hi a lo thleng tawh thin.
German coach Gerhard Rach kha Indian hockey team-a foreign coach rawih hmasakber niin, thla reilote hnuah 2004 Athens Olympics hma lawk kha petchhuah leh nghal a ni.
Rach hnuah Australian Ric Char-lesworth, Spaniard Jose Brasa, Aus-tralian ve ve Michael Nobbs leh Terry Walsh, Netherland coach rualkhat – Paul van Ass, Roelant Oltmans leh Sjoerd Marijne bakah banna thehlut hlimhawt Reid rawih an ni.
Ramdang coach zingah hian India leilunga hlawhtling ber chu Reid hi niin, a sulhnu chu tarlan tawh ang khi a ni e.
World Cup-a India chimchin: India rama mipa hockey world cup khelh zawh takah khan world ranking-a pangana ni chungin a thlengtu ram India chuan bul a tan a, thlengsang tura rinkai zingah tel mah se quarter-final a lut zo lo!
India hian sihnih faia Spain hneh chungin tournament bul tan bawk mah se an match hnihnaah goal awm loin England an draw a, an pool-ah pahnihna niin, quarter-final lut tur zawnna crossover match-ah New Zealand hmachhawnin, sihnih faia an hmahruaina an hum zawh loh hnu penalty shootout-ah an tlawm a, last eight thleng zo loin a thlengtu ram an tla!
Captain Harmanpreet Singh hoa inlan home team hian medal awrh pha lo chin tihfelna (classification match) lamah Japan (8-0) leh South Africa (5-2) sawpin, Argentina nen pakuana an ni dun!
Pakuana ni chunga tournament thlahliam kha he World Cup history-a a thlengtu ram hniam ber record thar a ni!