Crypto thunun tumin hma la

India-in hmalakna a neih hmain khawvel huapin crypto dan chungchangah inrawnkhawmna neih hmasak a ngai tiin Union Finance Minister Nirmala Sitharaman chuan a sawi a, global template siam ni se chutah chuan ram tin te thawkho se, chutiang a nih loh chuan dan lo siam ve ngawt chuan awmzia a nei dawn lo tiin a sawi.
Minister chuan chu chuan thatna leh theihna sang tak nei ‘distributed ledger technology’ thunun tur tihna a ni lo a ti thung a.
“India-in presidency nihna a chelh mekna G-20 ah India rawtna te ngaihtuah a ni a. Kumin hian G-20 chuan agenda ah a nei a. IMF te chuan cryptocurrecny kaihhnawihah paper siamin macroeconomic ngelnghehna a nghawng theih dan a tarlang a. G-20 in a din Financial Stability Board (FSB) te chuan financial stability lam thlurbing report pek ni se an ti a ni,” tiin Sitharaman chuan a sawi bawk.
“FSB report leh IMF report te hi G-20 hnuaia Finance Minister leh Central bank Governor tena July thlaa meeting an neih hunah ngaihtuah a ni ang a, September thlaah Prime Ministers leh President summit India a neih hunah ngaihtuah zui leh a ni ang” tiin Sitharaman chuan a sawi bawk.
“Thil ngaihtuah pawimawh tak tur chu digital currency te hi digitalised leh technology-driven a nih avangin heng technology identity te hi a chang chuan hriatfiah har tak a nih rualin theihna sang tak nei a ni bawk si a, chuvangin ram tinte lungrual ngaihna a ni” tiin Sitharaman chuan a sawi bawk a.
“Eng ram mahin amah chauhin heng technology driven crypto assert te hi an thunun thei lo, a chhan chu technology chuan border a nei lo va, a paltlang vek thei tlat a. Hei vang tak hian tha taka kalpui a nih theih nan chuan ram tin tena lungruala an tih a ngai a ni,” tiin a sawi bawk.
G-20 mai bakah OECD (Organisation for Economic Co-operation and Development) leh organisation dang IMF, World Bank te nen global template siam theih a ni ang, tiin Minister Sitharaman chuan a sawi bawk a. “Kan vaia kan thawh tlan a ngai ang a, a nih loh chuan crypto dan siam chu awmze nei lo a ni ang,” a ti bawk.