India-in chhiarpui nei thei mai dawn lo

Administrative boundaries of districts, tehsils leh towns te khawihchet theih loha dah hun tiam chu December 31 thlenga pawhsei a nih tak avangin kum 2024 General Election hmain Census neih a ni dawn lo tih a chianga ngaih a ni.
Kum sawm dana chhiarpui neih chu kum 2021 kha neih hun niin mahse Covid-19 pandemic leng vangin tiamchin awm lova sawn hlat a ni a. Tuna thupek hnuhnung berah eng vang nge tih tarlan a ni lo.
Registrar General of India chuan kar kalta khan thupek tichhuakin Census neih nana pawimawh boundary freeze te chu pawhsei niin January 1, 2024 thlenga pawhsei a nih thu a sawi a.
Thupek chuan Directorate of Census Operations chu State sorkar te hrilh hriaa December 31 hmaa administrative thlak danglam chungchangah notification an siam te chu Census office a thehlut tura ti turin a hrilh a ni.
Official te chuan boundary te khawih chet theih loha dah a nih hnuah thla thum tal chu enumerator te training pek nan hun a ngai an ti a. Hei vang hian April 2023-ah Census neih hman ngaihna a awm dawn lo va, a chhan chu General Election a nih tawh mai dawn vang a ni. Census neihna atan hian enumerator turin sorkar hnathawk 30 lakh vel laite chu hman an ngai dawn a.
“Heng sokar hnathawkte bawk hi General Election atana hman tur tho te niin Model Code of Conduct hman a ni hman tawh dawn si a, Census chu kum 2024-a sorkar tharin a kalpui a ngai tawh ang,” tiin official te chuan an sawi bawk.
India chuan kum 1881 atang khan kum 10 danah Census a kalpui ziah a, World War II lai pawhin a thulh chuang lo. Mahse, kum 2020 khan Covid-19 pademic leng vangin a thulh a ni.
Census neih leh tur chu digital census hmasa ber tur ni dawnin khua leh tui te chuan anmahni a census neiin self-enumerate tihna remchang an nei thei dawn a ni.
Census hi thuang hnihin – House listing and Housing Census leh Population Enumeration anga kalpui tur a ni a, a tlangpuiin thla 11 vel hun a duh thin a. Census chhawngkhatna chu National Population Register (NPR) nena update tur niin chhiarpui hi March 5, 2021 khan a nih dan tur ang chuan zawhfel vek tawh tur zawk a ni.
‘Report of the Technical Group on Population Projections’ tih National Commission on Population, Ministry of Health and Family Welfare tena an tihchhuahah chuan India population chu kum 2011-2036 inkar chhungin 121.1 crore atangin 151.8 crore ah a pung tura ngaih a ni a, chu chu kum 25 danah 25% a pung anga ngaih niin kum tinin 1.0% a pung tur anga hisap a ni a. Mihring chen bitna pawh kilometre khata 368 atangin 462 ah pung tura ngaih a ni bawk.
April thla khan United Nations chuan India population chuan 142 crore kai tura hisapin China a khum angin a ngai tawh bawk.