India-in lawng beih dem, Indian pakhat chin hriat loh

India-in lawng beih dem, Indian pakhat chin hriat loh
India chuan Pathianni khan Oman tuipui kama Iranian sipaiten ‘warning shot’ an tih hmanga an kah sumdawng lawng an bei chu a dem thu sawiin lawngah hian Indian 11 an chuang tih a sawi a. An zinga 10 chu chhanchhuah an ni a, pakhat chu chin hriat lohvin a la awm niin New Delhi chuan a sawi bawk.
External affairs ministry (MEA) chuan thuchhuah siamin, “Oman tuipui kama sumdawnna lawng, GFS Galaxy chu tukin khan beih a ni hi kan dem a, a chhunga chuang Indian 11 zinga 10 chu chhanchhuah an ni tawh a, Indian pakhat chin hriat lohvin a awm nia sawi a ni,” a ti a. Muscat-a Indian Embassy chuan Oman thuneitute nen inremna siamin zawn leh chhanchhuah hna an thawk mek tih a sawi bawk.
Ministry chuan, “Oman-a kan embassy chuan thil awm dan hi uluk takin a enfiah a, search & rescue operation kalpui mek kawngah Oman thuneitute nen hma kan la mek a, an chungah lawmthu kan sawi a ni,” a ti.
Lawng hi kah a nih hnuah a kang a, a thawktuten an kalsan a ni.
Cyprus flag intarlan, GFS Galaxy hi Iran-in Strait of Hormuz khar a nih thu a puan leh hma lawk khan warning shot-a kah niin sawi a ni a. He thil hi Iran leh US inkara buaina chhuak mekah ni eng emaw zat inremna nghet lo tak a awm hnuah a sosan thar mek laia thleng a ni.
GFS Galaxy beih a nih hnuah Tehran chuan buaina tamna tuikawngah hian phal loh chinah lawng hi a kal tih a sawi a, he thil thleng chungchanga phuba lakna eng pawh chu ‘chhanna nasa tak’ pek a nih tur thu a sawi bawk.
US chuan bungraw phurte beih an nih avang hian Iran a beih thar leh phah mek a. Tun kar chhunga American-ten Iran an beih vawi thumna a ni.
US Central Command (CENTCOM) chuan beihpui an thlaknaah hian Iranian sipai hmun 140 vel kah a ni a. Hengte hi missile leh drone hmun, lawng sipaite awmna, ralthuam dahna hmun, communication network leh tuipui kam thlithlaina hmunte niin an sawi.
Kar liam ta atanga zan thum beihpui an thlakah US sipaite hian hmun 300 chuang an kap tawh niin sipaite thuchhuah chuan an tar lang bawk.
Iran hian Middle East ram hrang hranga US hmunhmate beiin a chhang let a, heng zingah chuan Bahrain, Kuwait, Qatar, United Arab Emirates leh Oman te pawh an tel.
Kumin February 28-a indona tan hi a tawp theihna tura Tehran leh Washington inkara thil pawimawh tak chu Strait of Hormuz hi a ni.
Pathiannia thuchhuah a siamah New Delhi chuan Middle East-a sumdawnna lawngte beih a ni chu a lungawi loh thu a sawi nawn leh bawk.
MEA chuan, “He biala sumdawn lawng lian beihna thleng chhunzawm zel hi a ngaihtuahawm tak zet a. Inbengdai turin kan ngenna kan ngen nawn leh a, he biala remna leh muanna a lo kir leh theih nan indawr chu a chhanna pawimawh ber a ni,” a ti.