India junior hockey team chak tluang zel

India junior hockey team chak tluang zel
Mizo tleirawl pahnih PC Lalrinpuii leh Lalthantluangite telna Indian Junior Women’s Hockey Team chuan European Tour an khelh mekah karliamta Inrinni, June ni 14, 2025 khan he Tour-a a zawna vawi li an chakna ni turin FIH Junior Women’s World ranking-a No. 5 luahtu Autralia lakah 2-1 hnehna an sualchhuak leh.
He inkhelah hian tan atanga minute 5-na lekah Australia lamin penalty corner an hmuh chu goal-ah an chantir nghal.
India team chuan nawr let ve leh nghalin, minute 8-naah penalty corner hmang thoin Nandini chuan India si phurh a sut ve leh nghal.
First quarter zawhna’n minute khat chauh a awm tawh tihin minute 14-naah India vice captain Hina Bano chuan India penalty corner hmuh chu goal-ah a rawn chantir ve leh bawk.
Second, third leh fourth quarter-ahte goal khungna hun tha nei ve ve mah se khawi lam mahin goal dang an neih belh theih tak loh avangin India chu 2-1-in a chak ta a ni.
Naktuk,
June ni 17, 2025 (Thawhlehni) hian India chuan he tour a an match ngana leh a hnuhnung ber atan FIH Junior Women’s World Ranking No. 1 Netherlands an hma chhawng leh ang.