RBI-in kum nga dawn hnuah repo rate a tihniam

RBI-in kum nga dawn hnuah repo rate a tihniam
India-a central bank chuan Asia-a economy lian ber pathumna thang chak tawk lo puihna turin sum tihpunna bi (interest rate) chu kum nga dawn hnua a tihniam.
Reserve Bank of India (RBI) hian an repo rate chu 6.5% atangin 6.25%-ah a tihniam a, hei hi a hma atang tawhin economist tam takin an lo rinlawk a ni.
Repo rate an tih hi central bank-in sumdawng bank hnena sum a puktirna punna zat bi tihna a ni.
India-a ram sum thawh chhuah (Gross Domestic Product – GDP) hi kum li chhunga a hniam lai ber tawng mekin 6.7% a ni a, repo rate tihhniam hi a tihpun leh tumnaa hma lakna pakhat a ni.
RBI Governor Sanjay Malhotra chuan bank hian an policy chu ‘lai takin’ a la kalpui reng tih a sawi a, thanna atan hmun zau zawk hawn a ni a, hei hi rate tihhniam hian a lantir tih a sawi.
Khawvela economy thang chak ber ber ramahte investment-a thanna leh khawpuiin thil a ei hek lutuk chu an thanna tithutu pakhat a ni thin a. India-ah pawh hei hi niin sumdawngte hlep pawh kumin tangka kum kal meka a chanve liam ta chhungin a tlahniam bawk.
Malhotra chuan tlahniam rih mah se thil man sang chak lutuk lo te, thingtlang lama sum chevel tam leh thlai tharna tur thil siam chhuah tamte chuan an than a titha leh dawn niin a sawi lawk.
Repo rate tihhniam a nih rual hian thil dahkham hlutna leh credit card pawisa punna pawh a tlahniam nghal dawn a, company tan thil an pukna man punna bi pawh a hniam nghal dawn bawk.
Central bank-in rate a tihhniam hi a hmaa an lo inruahman lawk tawh a ni a, an inruahman lawk tawhnaah hian tual chhung bank-ah $ tlyklehdingawn 18 dah luh pawh a tel a, hei hi tual chhunga sum lengvak a tlem lutuk tur danna atana tih a ni.
RBI-in an rate an tihiam hi Union Budget pharh taka middle class an tihte atanga chhiah an lak thin tihtawp hnua puan niin chhiah awl tur avang hian kum khata $ tluklehdingawn 12 vel chân a nih phah ang.
Sum tam tak an hmuh thin hmu tawh dawn lo mah se Narendra Modi-a sorkar chuan mi vantlangin sum hman tur tam an neih dawn avangin sum a titam tho dawn niin an sawi a. Chu chuan ram economy thang muang deuh chu a chawi kang zawk turah an ngai a, economist-te pawhin hemi zui chiah hian central bank-in an rate chu 0.5% –1% velin ram thanna turin an tihniam ve tura an ngaih thu an lo sawi lawk tawh bawk a ni.
Hetih lai hian US President Donald Trump-in ram dang nena insumdawn tawnnaa chhiah lak thin a tipung a, ram dangin an chhan let ve zel bawk avangin beisei ang ngawtin thil a thleng lo ve thei tih mi thiamte chuan an sawi bawk.