India leh US firm-in indo thlawhna engine atan inremna nei hnai

India leh US firm-in indo thlawhna engine atan inremna nei hnai
India chuan Light Combat Aircraft Tejas-in a hman tur GE-404 engine 113 siamsak turin US firm GE nen $ tluklehdingawn khat inremna an siam hnai a. Indawrna hian a tha lam pan zelin September-ah tihfel hman a nih a rinawm niin news agency ANI chuan a hming an tar lan loh thu an lakna atanga an hriat an tar lang.
Inremna hi an siam thei a nih chuan US firm hian thla tin engine pahnih zel pein India-in indo thlawhna a siam tumah hman a ni ang.
Tuna inremna siam puitlin tep hi US-a Donald Trump-a sorkarin India laka chhiah sang tak a lak tur a puan hnua a pahnihna a ni a. A hma khan LCA Mark 1A indo thlawhna 97 leina tur Rs vaibelchhe 62,000-in inremna an lo siam tawh bawk a ni.
Sorkar hnuaia firm, Hindustan Aeronautics Limited (HAL)-in GE nen hian LCA Mark 1A 83-a hman tur GE-404 engine 99 leina tur hian inremna a siampui dawn a, heng indo thlawhna hi Indian Air Force-in a hman tur niin a dang 113-ah inremna siam a ni bawk ang.
Inremna hi siam a nih chuan HAL hian chhum lo chat lovin GE-404 engine 200 chuang a nei dawn tihna a ni a, lehlam lehlam hian tihkhawtlai loh dan an dap bawk a. India hian LCA Mark 2 leh Advanced Medium Combat Aircraft atan GE-414 engine 200 a mamawh a ni.
HAL hian kum 2029-30 chhungin a thlawhna siam puitlin hmasak 83 chu IAF hnenah a hlan hman beisei a ni a, kum 2033-34 chhungin LCA Mark 1A 97 a hlan leh hman dawn bawk a. Sorkar firm hi GE nen hian GE-414 engine siam danah a technology 80% vel inhrilh turin inremna siam tumin an indawr mek bawk.
HAL hian thlawhna a siam turte hi a puitlin theih hunah chuan IAF-in thlawhna hlui tawh tak a hman mek, MiG-21-te chu a tahtawlin a chawlhtir hret hret dawn a, hmanraw changkang zawk a nei thar dawn a ni.
India hian ama kutkawih ngeia ram venhimna hmanrua neih leh siam chhuah tumin hma a la nasa hle a. Ama ram chhung ngeia indo thlawhna engine siam tuma beiin French firm Safran nen an thawkho mek a ni.