India nulate champion zo ta lo!

India nulate champion zo ta lo!
China rama Women’s Asia Cup Hockey 2025 khelh zawh tak final-ah nizan khan Indian women’s hockey team chu tournament thlengtu China lakah 1-4-in an tlawm a; tournament champion nih mana nakkum Belgium leh Netherlands inthlentawm tur FIH Women’s Hockey World Cup 2026 khel tura tlin nghal theihna ticket Women in Blue hian an sualchhuak zo ta lo!
Gongshu Canal Sports Park Stadium-a nizan inkhelah India hian bul an tan fuh hmasa zawk a; tan atanga second 39-na lekah he final match-a an penalty corner hmasaber hlawhchhuakin, Navneet chuan goal-ah a chantir a; first quarter-ah India hian sikhat faiin hma an hruai phawt.
Minute thum an khel tling leh tihah China-in an siphurh sut turin hun remchang hmu mah se India chuan penalty corner an dang thei a, 1-0-in first quarter a zo.
Khawng zawkin second quarter-ah China an inlan a, mahse, Indian defence-in an hna an tlin a, a bikin, keeper a chetha a, mualneitute khan goal an thun nghal mai lo.
Chuti reng erawh a ni thei ta lo a, Ou Zixia chuan penalty corner atangin China siphurh a sut a, Li Hong-i goal nen China-in third quarter tawpah 2-1-in hma an hruai.
Final quarter-ah leh Zhong Jiaqi-te’n an khung belh a, Siami leh a thiante’n a tira an goal khat thun bak goal dang an sualchhuak zo lo a, he tournament-a a vawi hnihna atan Chinese nulate lakah an tlawm!
China khan record ding lai nihrualpuiin a vawi thumna atan Asia Cup title an chawi a, Hockey World Cup 2026 khel turin an tling nghal.
Inrinni khan India chuan an Super 4s match hnuhnung berah champion lai Japan chu 1-1-in an inhnehtawkpui a, point-a an san zawk avangin Lalremsiami telna India team hian final an lut ta zawk a ni.
Japan game-ah hian 1st quarter minute sarihna lekah Beauty Dung Dung chuan India tan goal a khung nghal a; hemi hnu hian khawi lam lam mahin 3rd quarter tawp thleng pawhin goal an khung thei lo.
4th quarter-ah hun tawpna’n minute hnih chauh a awm tawh tihah Kobayakawa chuan Japan siphurh a sut ve leh ta hlauh a ni.
India leh Japan-te hi group stage-ah khan lo insu tawhin, kha mi tum pawh khan sihnih ve ve thunin an lo in-draw tawh bawk a; Inrinnia Japan an inhnehtawkpui leh avangin India tan final a hmin ta zawk a ni.
Inrinni inkhel dangah China leh South Korea pawhin an Super 4s match hnuhnung ber khel ve bawkin, sikhat faiin mualneitu China an chak.
Super 4s match khelh zawh hnuah China chuan an tumpui zawng zawng hneh vekin point kua an hmu a; India chuan point li neiin an dawt a, an hnuaiah point hnih nei Japan leh point khat hum South Korea awmin, a hniam pahnih hian nizan khan 3rd/4th place match an khel ve bawk a, result tarlan hman a ni lo.