India squad thlitfim leh turah Mizo 3

India senior men’s national team head coach Igor Stimac chuan tunhnai khan Hero Intercontinental Cup khel tur squad khawrpum hna thawk tanin, national camp luah hnua la thlitfim leh tur player 41 a puang a, koh zingah Mizo foot-baller pathum an tel.
National camp hi Bhubaneswar khawpui-ah May ni 15, 2023 atangin an lut tan dawn a, enchhinna duhtawk a ngah hnuah head coach chuan June 9-18 chhunga Odisha khaw-puiin a thlen tur Hero Intercontinental Cup khel tur squad nghet a puang ang.
Fifa ranking thar bera 101-na luah mektu India hi kan hma Bhubaneswar khaw tournament-ah hian an aia ranking-a sang pakhat Lebanon (99) leh hniam zawk pahnih Vanuatu (164) leh Mongolia (183)-te nen group khatah an awmho dawn a; he mi atana squad hmasa luah pha Mizo pathumte hi a tawp thlengin an in-hamtang zo dawn em a hriat rih loh.
Blue Tigers hian kum bul an tan tha thawkhat a, Manipur khawpui Imphal-a Hero Tri-Nation Cup-ah khan an tumpui pahnih Myanmar (1-0) leh Kyrgyz Republic (2-0) an hneh a; Hero Inter-continental Cup atan pawh hian beiseina sang deuh zawk an nei ngam tura beisei a ni.