The Great Messi kalna tur inrinsiakna vung chho zel

The Great Messi kalna tur inrinsiakna vung chho zel
Season tawp ruala a contract neih lai hmang zo tawh tur Paris St Germain forward Lionel Messi chuan Ligue 1 club-ah inremna thar a ziak dawn lo tih a chiang tawh a, a club thar tur inrinsiaknain football khawvel a chiah hneh hle laiin Arab club thawm a lian chho hluai a, hemi chungchangah hian Thawhlehni khan a pa chuan thuthar thehdarhtute hnenah a fapain tun dinhmunah Saudi Arabia rama khel turin inbiakremna emaw contract ziah emaw a la nei lo tih a sawichhuak.
Tarlan tawh thin angin, Middle East nena sawizawm a nih tak hluai chhan hi club thu loa Saudi Arabia rama a zin vang leh training session a bawhpelh avanga club-in an hrem vang kha tiin a sawi theih ang a; Thawhlehnia French media-te tarlan dan phei chuan Saudi Arabian club Al-Hilal tana khel turin Messi chuan thu a pawtchat fel tawh a, contract puitling an ziah hmain inbiakna kalkawngah a hmawr bawk chiah an hmabak tawh niin an chhuah!
Hemi chungchangah hian kum 35 mi Messi pa Jorge chuan Instagram kaltlangin thuchhuah a siam nghal a, “Kum thara a khelhna tur chung-changah eng club nen mah thu thlun a la awm lo. PSG-a league season a hman zawh hma chuan Lionel-a hmalam hun tur chungchangah hian eng thutlukna mah siam a ni ngai lo ang.
“Season-te hi han zo fel ve phawt se, hmalam hun zirchianna leh enginnge min hmuak tihte kan han thlir ve phawt ang a, chumi hnuah thutlukna chu siam chauh a ni ang.
“Tuna ka hrilh theih awmchhun che u chu tute nen mah inremna siam a la ni lo. |awngkamin emaw ziakin emaw a thuphunga remtihna emaw pawh engmah sawi tur a la awm lo. Season tawp hma chuan a awm lo bawk ang,” a ti.
Messi hian tunkar Thawhtanni khan a club vawn laiah training chhunzawm leh tawhin, tunhnaia a khawsak dan avang khan PSG leh a team mate rual hnenah thupha a chawi tawh nghe nghe.
Argentina captain lamhnai tak pakhatin Reuters a hrilh danin, Messi hian tawngka chuan season thara Saudi Arabian club Al-Hilal zawm tura sawmna a dawng tawh a, kum khata a hlawh atana an tawktarh pawh sang tak a ni!
Thla thara kum 36 tling chho ve tawh tur Messi hi nikum khan oil hmanga hausa ram hian tourism ambassador atan an ruat a, May 2022 khan an khawpui Jeddah a tlawh nghe nghe.
World Cup final chawlh a hman zawh hnuin kumin January thla khan club lamah a kir a, Arab ramah hian thlawklut lehin, tah chuan PSG leh Saudi League star team friendly match a khel a, a elpui kumhlun Cristiano Ronaldo nen khelmualah an inep leh a nih kha…