India tana Asian Junior TaekwondoChampionship khel tur Ramdingliani

India tana Asian Junior Taekwondo
Championship khel tur Ramdingliani
July ni 25-26, 2025 chhunga Kuching, Malaysia-a khelh tur 13th Asian Junior Taekwondo Championships (G2)-in India tan Chanmari West tleirawl Ramdingliani (TABF) a inlan dawn a, a khelhna tur hi under 49 huangah a ni ang.
He inelnaa tel turin Rami hian Dehradun khuaa khelh zawh tak Junior National Championship-ah khan gold medal a awrh a, he championship-a medallist-te hian Asia khawmualpui huap intihsiak liana India ai awh thei tur zawnna selection khelin, selection-ah hian final list thlanchhuah leh a ni a, chu ta hming langte chuan Punjab-ah final selection an hmachhawn zui leh a, Mizo tleirawl Rami hi thlan chhuah zingah a tel ta a ni.
India team hian Chandigarh University, Punjab-ah ngawr takin training an kalpui hnuah vawiin hian Delhi Airport atang Malaysia hi an pan tawh dawn a ni.
Chanmari West nula Ramdingliani hi Taekwondo Academy of Best Friend atanga zirchhuak niin, tunah hian India rama taekwondo zirna tha berte zinga mi NCOE Lucknow-ah a training mek a ni.
Mizo player hian national leh international level-ah Mizoram tan medal 24 lai lo tawhin, Mizoram inelna sang ber Champion of Champions title pawh kum 15 mi lek niin a lo hlawhchhuak tawh bawk a ni.
Asian Junior Taekwondo Championship-ah hian India aiawhin mipa 10 leh hmeichhia 10 an chhuak dawn a; Asia khawmualpui am hrang hrang atangin player thahnem tak an tel dawn a ni.