Indian passport-in thiltihtheihna hloh, visa tel lovin ram 80 tlawh thei

Indian passport chuan a thiltihtheihna hloh thenin 2025 Henley Passport Index-ah 85-naah a awm a, visa tel lova zin theihna ram 57 chauh a nei ta a. Nikum khan 80-na niin a neiten visa tel lovin ram 62 an tlawh thei thin a ni.
Singapore chu passport thiltithei ber nih chhunzawmin visa tel lovin ram 193-ah a zinpui theih a. South Korea chu pahnihna niin ram 190-ah awlsam taka zinpui theih niin Japan-in pathumna a hauh va, ram 189-in visa nen lo an pawm.
Germany, Italy, Luxembourg, Spain leh Switzerland ramte chu palinaah awm hovin visa tel lovin ram 188-in an pawm a. Austria, Belgium, Denmark, Finland, France, Ireland leh Netherlands chu panganaahawmin ram 187-in an pawm.
Hungary, New Zealand, Norway, Portugal leh Sweden chu paruka niin visa tel lovin ram 186-in an pawm a. Australia, Czechia, Malta leh Poland ramte pasarihna niin visa nen lo ram 185 an tlawh thei.
Pariatnaah Croatia, Estonia, Slovakia, Slovenia, United Arab Emirates leh United Kingdom awmin ram 184-in visa tel lovin an awm a. Canada chuan pakuana hauhvin visa tel lovin ram 183-ah a zinpui theih.
Latvia leh Liechtenstein chuan 10-na an hauh bawk.
US chu 12-naah Malaysia nen awmin visa tel lovin ram 180-in an pawm a. Tun hi passport thiltithei zual 10 zinga US a tel loh vawi khatna a ni.
Nikum khan No. 1-ah France, Germany, Italy, Japan leh Singapore awmin ram 194-in visa tel lo pawhin an pawm a, US hi pasarihnaah awmin ram 188-in visa nen lo an pawm.
Kum 2025-a list-ah hian India hi 85-naah Mauritania nen an awm a. Angola, Barbados, Bhutan, Bolivia, British Virgin Islands, Burundi, Cambodia, Indonesia, Iran, Jamaica, Kazakhstan, Kenya, Malaysia, Maldives, Philippines, Sri Lanka leh Thailand ramte chu Indian passport neituten visa tel kher lova tlawh theih ram zinga mi.
India thenawm, Pakistan chu 103-na niin ram 31 chauhvin visa nen lo an pawm a. Bangladesh chu 100-na niin ram 38-in visa tel lova an ram tlawh theiah an pawm a. Nepal chu 101-na niin 92-naah Bhutan an awm a, Sri Lanka chu 98-na a ni bawk.
Afghanistan chu khawvela passport thiltithei lo ber niin ram 24 chauhvin visa tel lovin an pawm a. Syria leh Iraq ramten an dawt a ni.
Henley Passport Index hi khawvel puma ram khat khua leh tuiten passport an neiha zalen taka ram an tlawh theih zat dinhmun tar lanna a ni a. Kum 2005 khan Henley & Partners Visa Restrictions Index tia tihchhuah tan niin January, 2018 khan Henley Passport Index tia thlak a ni.