Indian sipaiten C-295MW thlawhna nei tep

Indian sipaiten C-295MW thlawhna nei tep
Indian Air Force chuan ramri bawra an thlawhna hluite chu a thar tha zawkin an thlak hnai a. Avro transport aircraft chu C-295MW tactical transport aircraft hmangin thlak a ni dawn.
IAF, Indian Navy leh Coast Guard hian C-295 thlawhna an dawng thei tep a. Hlan tur hian ruahmanna kalpui mek a ni a. C-295 marine version hi Request for Proposal (RFP) pawh March, 2025 khan tichhuak tawhin Defence Acquisition Council pawhin Acceptance of Necessity an tifel tawh.
C-295MW thlawhna 15 chu neih a ni dawn a, pakua chu Navy tan niin Coast Guard tan paruk a ni dawn.
India hian kum 2021 khan Spain nen C-295MW thlawhna 56 inleisakna tur hian inremna an lo siam tawh a. Heng thlawhnate hi Gujarat-a Vadodara-a siam tur a ni a. IAF chuan squadron hmasa ber chu Vadodara-a an hmunah chuan an nei tawh.
Prime Minister Narendra Modi chuan Spanish president nen he hmun hi an hawng dun a. Tata leh Airbus tangkawpa dinna hi thawh mek a ni a. Hei hi Indian mi mal company-in sipai hman tur thlawhna a siam hmasak ber tur a ni.
Inremnaah chuan thlawhna 16 chu Spain-a siamin India-a hlan tur a ni a, 40 chu India-a siam tur a ni a. IAF hian C-295 thlawhna 15 a dawng tawh a, Made-in-India C-295 hi nakum August-ah pek chhuah hman tur a ni.
C-295 hian bungrua ton 5 atanga 10 phur thei niin sipai 70 emaw, paratrooper 50 emaw phur thei a ni a. Tlankawng tawi tê-a tum leh thlawk thei niin metre 670-a thui atanga thlawk chhuak thei leh metre 320-a seia tum thei a ni.
Hei hi China nena inrina, Line of Actual Control-a a tangkaina a ni a. Darkar 11 chhungin darkar khata km 480-a chaka thlawk thei a ni a. Damdawi thila hman turin hlang 24 phur thei a ni bawk.