Indian thawn hawte Punjab-ah tumpui leh ta

Indian thawn hawte Punjab-ah tumpui leh ta
Donald Trump-a sorkarin an rama dan lova ram dang mi awmte laka beihpui a thlakna kal zelah Inrinni khan United States atanga Indian 119 phur thlawhna chu Punjab-a Amritsar tumhmunah a tum leh ta a. Ni 10 liam taah khan hetiang bawk hian thawn haw hmasakte an lo thleng tawh.
February 5 khan US sipai thlawhna hmangin Indian 104 chu Amritsar-ah phurh thlen an ni tawh a. Pathianni zan khan mi dang 157 phurh thlen an ni bawk.
Inrinnia phurh thlengte hi US Air Force C-17 Globemaster hmanga phurh niin Amritsar International Airport-ah Inrinni zan dar 11:40 khan tumpui an ni.
AN zinga 67 chu Punjab-a mi an ni a, 33 chu Haryana, Gujarat mi pariat, Uttar Pradesh mi pathum, Goa, Maharashtra leh Rajasthan mi pahnih theuh leh Himachal Pradesh leh Jammu & Kashmir mi pakhat ve ve an ni a. An chhungte pawh hrilh lawk an nih angin tumhmunah hian an lo hmuak hlawm.
Thawn haw hmasak zawkte kha Haryana (33), Gujarat (33), Punjab (30), Maharashtra (3) Uttar Pradesh (3) leh Chandigarh (2) mite an ni a. San Antonio, Texas atanga thlawh chhuahpui an ni.
Indian thawn haw hmasak berte hi thlawhnaah hian phuara an tuma an chhuk dawnah chauh phelh an ni tih thu a than chiam avangin India-ah hian sawi a hlawh hle a. Parliament-a budget session kal mekah pawh sawi chhuah a ni.
External Affairs Minister S Jaishankar chuan he mi chungchang hi US hnenah an thlen thu leh thawn hawte hrehawm taka titawh lo tura an ngen thu an hrilh tih a sawi a. US-in an rama dan lova awmte a thawn haw thin chu thil thar a ni lo va, kum tam tak a lo tih tawh a nih thu a sawi bawk.
Kar liam ta tir lama US tlawhtu, Prime Minister Narendra Modi-a chuan US-a dan lova Indian cheng zawng zawngte lak kir vek an nih tur thu a saiw bawk a. Hetih rual hian mihringa sumdawnna pawh titawp tura tan lak a nih tur thu a sawi bawk.
Indian thawn hawte enkawl dan chungchangah India-a US Embassy chuan ‘kan ramin pem luh leh chhuah dan a neih hi kan ram himna leh vantlang himna atan a pawimawh’ tih an sawi a. “United States hian a rama dan lova lutte a pawm lova hawtir zel a tumnaah a chiang a ni,” tiin embassy thupuangtu chuan a sawi.
India hi Mexico leh El Salvador dawta US-a dan lova a ram mi awm tam ber a ni.
Hetih lai hian Punjab Chief Minister Bhagwant Mann chuan Inrinni chawhma khan Amritsar tumhmun tlawhin a sorkar chu thawn haw dawngsawng turin a inbuatsaih tih a sawi.
Punjab mi ni lo thawn hawte hi Amritsar atang hian Pathianni tuk khan Delhi panpui leh phawt an ni ang a, chuta tangin an khua theuh panpui leh an ni dawn tih a sawi.
Mann-a hian sorkar laipuiin an state tumhmun kher a thlang chu tihhmingchhiat a tumnaah a puh a, khawpui thianghlim hi chu ‘deport centre’ atan hmang lo turin a ti.
A hma khan Punjab mi thawn haw tam zawk chuan khawsak that zawk beiseiin US an pan tih an sawi hlawm a. Hetih laia man chhuah leh thawn haw an ni chu an beisei a thamral ta tih an sawi bawk.