Indian Wells thil thleng thenkhat

Indian Wells thil thleng thenkhat
California chhim lam khawpui uap lum churh Indian Wells hmuna tennis tournament lian BNP Paribas Open khelh mek hmeichhe singles quarter-final match pakhatah Nilaini khan Aryna Sabalenka chuan American mihang nula Coco Gauff laka 6-4, 6-0 hnehna nuamsa changin semi-final a lut a, seventh seed Maria Sakkari nen final luh an inchuh.
Australian Open champion hian break point vawikhat pawh hmachhawn buai loin Gauff a thehchhuak a; double faults harsatna a tawh thin pawh sukiangin, American lakah vawikhat pawh a chesual duh ta lo a, ace vawinga neiin, a first serve-a a hlawhtlinna rate pawh 87% daih a ni.
Set hmasabera 2-0-a hniam nghal sixth-seeded Gauff khan second seed Belarusian khelh dan level a do zo ngang lo a, California mipuiin an chipui mihang player kha auhphur tum ngial mah se an fuihphur zo lo!
Inkhelh ban on-court interview-ah chu chu sawichhuakin Sabalenka chuan nui chungin mipui lam a hawi a, “Nangni, mipuite khan kan khaw lama min thawnhaw in duh tih ka hria,” a ti zet a, sawizawmin:
“Kan pahnih min tan tura lo chhuakkhawmte chungah lawmthu ka sawi a, amah hi in tan ber chu ni bawk mah se kei inchhiar tel chungin lawmthu ka sawi duh fan a ni. He hmun boruak hi awihawm loh khawpa ropui a ni a, chhuahsan mai ka duh bik lo a, a rei thei ang ber cham ka duh a ni,” tiin tantu nei lo zawk ni mah se tlak mai a hreh thu fiamthu titakin a sawi.
Last eight inkhel dangah he hmuna nikum runner up Greek Sakkari chuan set hmasaber hloh zet chungin 15th-seeded Czech Petra Kvitova lakah 4-6, 7-5, 6-1 hnehna a changlet a; two-time Wimbledon champion Kvitova kha game hmasaberah chefuh mah se double faults a ngah chhoh tak avangin a tumpuinuin leirem a rah phah zui ta a ni.
Darkar hnih leh minute 15 chhunga hnehna a chan hnuah Sakkari chuan a career-a a comeback pui berte zinga pakhat a nih thu sawi chungin set khatnaah a tumpui khan amateur ang leka nawiin a khelhtir tih a sawi.
Mipa singles quarter-final lamah British number one Cameron Norrie chetthat kal tluang lai American Frances Tiafoe chuan a dangchat.
Kum 2021-a he he title hawn ve tawh Norrie hian a khelh that thin dan a pha lo hle a, 14th seed chuan 6-4 6-4-in a hnawtchhuak.
Kum 27 mi 10th seed Norrie hian unforced error ngawt pawh tum 28 tehreng a nei tling a, inkhelh banah a dinhmuna lawmna tur a awm loh thu sawi chungin an draw kal laia hming hraw la bangte en chungin a tan hun tha lutuk a nih thu leh Indian Wells title dang hawn leh tura a hun tha neih a bawhpelh tih a sawi a, kha match-ah khan Frances chu player tha zawk a nih thu a tarlang phal bawk.
Tiafoe hian semi-final pakhat zawkah Russian fifth seed Daniil Medvedev a tum ang.
Nikum khan kum 25-a upa Tiafoe hian US Open semi-final thlengin, tun hi Masters 1000 event-a last four of a luh vawikhatna a ni thung a, a thlen chin kha a tan a lianin, a hlim takzet tih hahipin a sawi.
Briton Norrie a tlawm leh tak hnuah Indians Wells-a British singles beiseina a tawp fel ta a, Thawhlehni khan a chipuite zinga beiseiawm dang Jack Draper leh Emma Raducanu-te an lo tla fel tawh a ni.
Thla hmasa mai Rio de Janeiro khawpuia title hlawhchhuak Norrie khan match riat chak zawn mek chungin quarter-final a khel a, hnehna a chan zawh loh hnua kumin bika a chak leh tlawm dan record chu 21-4 niin, kum kal mekah vawili chiah a la chak lo.
A tum leh tur Russian Medvedev hi kumin January thla Australian Open third-round-a American Sebastian Korda a hneh loh hnu khan ATP Tour-a la tlawm leh miah lo a ni a; tunhnai chhoah ATP title la mawlh mawlhin, a champion-na mualte chu Rotterdam, Doha leh Dubai a ni.
2021 US Open champion Medvedev hian Nilaini zan khan Spaniard Alejandro Davidovich Fokina lakah 6-3 7-5 hnehna changin California-ah men’s semi-final a lut a, tour kal meka vawi 18 a chakzawnna a ni tawh.