Aizawl khawpui huamchhunga hmasawnna hna hrang hrang thawktu department/ corporation leh a kaihhnawih department-te chuan hnathawh insu buai lo leh indip tawn loa hma an lak theih dan tur sawi ho a ni.
-- Advertisement --
Aizawl khawpui hmasawn nana hmalakna hrang hrangte rualkhai taka thawh a nih theihna’na mawhphurtu, Coordination Committee on Management of Aizawl City chu Thawhlehni khan an chairman, Aizawl bawrhsap Dr Lalhriatzuali Ralte hoin an thukhawm a, Aizawl mipui tui in tur tam zawk pek tumna (Augmentation of Aizawl Water Supply Scheme hnuaia Water Treatment Plant for 37 MLD) siam nana Hunthar peng atanga Chanmari West kawnga SIPMIU-in tui lakna tur pipe phum a tum mek dan sawi a ni a. Thutkhawm hmasa rel angin a hmunah enfiah ho a ni a, helai hmun hi lei che thin a nih avangin fimkhur taka hmalak ngai chi a nih avangin zau zawka ngaihtuah a nih theih nan State Disaster Management Authority-ah thlen nise, an ti.
Chairman chuan Aizawl khawpui hmasawn nana hmalakna chi hrang hrang chu insu buai loa rualkhai tak leh mumal zawka kalpui a pawimawh, tiin, department hrang hrangten hma an lakna inhriattawna thawh tlan a tul tih a sawi a. Khawpui kawngpui tihnawk zawnga bungrua leh lirthei dah thinte chuan mipui tan harsatna a thlen thin avangin kawngpui humhalh a nih theihna’n PWD leh AMC in uluk zawkin vil se, a ti. Chak zawka bawhzui a nih theih dan zirchiang turin Addl DC, SP Aizawl, SP Traffic, PWD leh AMC ruat an ni.