Mizo tawngin science leh maths dah
Mizoram Board of School Education siam class IX textbook thar, science leh mathematics zirlaibu Mizo tawng leh Sap tawnga dah kawp (bilingual textbook) chu Human Resources Development Board vice chairman Dr L Thangmawia, MLA chuan a tlangzarh.
HRD Board vice chairman chuan zirlaite tana class IX science leh mathematics zirlaibu Mizo tawnga chhawpchhuah a ni ta chu Zoram mai ni lo, India ram ang pawha zirna lama mellung pawimawh tak a ni, tiin, he zirlaibu thar tihchhuah a nih theihna’na ngaihtuahna sengtu School Education minister Pu Lalchhandama Ralte leh a hlawhtlin theihna’na bawhzuitu MBSE, zirlaibu Mizo tawnga lehlin hna thawktu zirtirtu leh mithiamte chungah mipuiin aiawhin lawmthu a sawi tih a sawi a ni.
Science leh mathematics tawngkamte hi Mizo tawnga a tlukpui kan neih loh a tam bik avangin lehlin hi hna hautak tak a ni tih sawiin, “Sawrkarin Mizo Language Development Board a din hi hnathawk theia a awm hunah chuan heng technical term tam tak hi Mizo tawnga senglutin, kan tawng tihausatu a la nih ngei ka ring a, zirlaiten science leh mathematics zirlaibu mahni tawng ngeia chhiar tur an neih hnu chuan subject hara an ngaihna thin pawh a tih ziaawm ngei ka beisei,” a ti.
Lehkha thiam tura Sap tawng thiam a pawimawh avangin Sap tawng thiam tura beih nasat chu thil tul ni mah se, mahni hnam tawng hnualsuat leh thiam loh phah na’na hman chuan kan hnam kal zel turah thil pawi tak a thlen theih avangin, mahni hnam tawng thiam tak chunga Sap tawng thiam tura tan lak dan zawn a ngai tih Dr L Thangmawia hian a sawi. “Tun ang zela kan kal chuan Sap tawng thiam tak tak si lo, Mizo tawng thiam chuang si lo thahnem tak thangthar zingah kan awm a hlauhawm,” a ti.
MBSE chairman JH Zoremthanga chuan India ram Education Board zingah MBSE chu bilingual textbook nei hmasa ber an ni tih a sawi.