Indonesia rawtna khawthlang ram ten hnawl

Indonesia Defence Minister Prabowo Subianto chuan Russia leh Ukraine idnona tihtawpna tur ruahmanna defence summit, Singapore a neihah a pharh a, hei hi nasa taka sawiselin a awm zui nghal thung.
“Russia leh Ukraine te hian inbakkaihna titawpin hma la nghal turin ka ngen a ni,” tiin Subianto chuan a sawi a, thla 15 chuang indona kalpui tawh chuan Asian ram economy te tibuaiin food supply lamah harsatna a thlen nasa tiin a sawi a.
Shangri-La Dialogue defence summit neihnaah Subianto chuan inkahhaina chu ‘tuna ram luah chin ve ve’ ah kalpui ni se demilitarised zone siam ni bawk se, chungte chu United Nations peacekeeping forces ten veng se a ti a. A hnuah ram buai inchuhah UN huaihawtin referendum kalpui ni se a ti bawk.
“UN peacekeeping operation neih nan Indonesia chuan tha thawh a inhuam a ni,” tiin a sawi bawk.
China pawhin peace plan siamin indona tihtawpna tura a ruahmanna siam te a pharh a, chungte chu European Union politicians te chuan an ngaina lo hle thung a. Beijing chuan neutral inti reng mah se, Moscow-in Ukraine a run chu demna thu a la chhakchhuak duh lo thung.
Chutih laiin United States leh Western allies te chuan Russia-in a run hnuah Ukraine puih nan dollar billion tel tanpuina leh chhawmdawlna an pe lut tawh thung a.
Jakarata hi non-aligned diplomacy duhtu inti niin remna a awm theih nan hma la tawhin nikum pawh khan Indonesian President Joko Widodo chuan Kyiv leh Moscow te a lo tlawh tawh bawk.
Mahse, Defence Minister Subianto rawtna chu summit-ah sawisel nghal niin EU Foregn Policy Chief Josep Borrell chuan dik taka thil kalpui tur a ti thung a. “Ukraine ah remna kan awm tir a ngai a, mahse, remna chu inpeka remna a ni tur a ni lo,” tiin Borrell chuan a sawi.
Hei hi chhangin Subianto chuan, Indonesians-te hi tum engzah nge runin an awm tawh zawt teh u, soverengnty violation hi Europe-ah chauh lo pawh a thleng a nia,” tiin a chhang a, “Resolution plan kan siam a ni, tu nge dika tu nge dik lo ka sawi lo,” tiin a sawi bawk.
Indonesia hi UN resolution-a Russia-in Ukaine a run demna thlawptu a ni a, mahse, Moscow lakah hrekna a kalpui ve duh lo thung.