Infiamna – Thil tak tak

Ram in ri a nei a, hnamin tihphung leh khawsak phung hran kan nei theuh a. Sakhaw biak phung leh kal hmang pawh a in ang lo thei viau. Khawi ram leh hnam pawhin a ramri leh a hnam bo pil an phal ngai lo ang. Chutih lai erawh chuan infiamna erawh chuan, ram ri leh dai danna bang tam tak su darhin, chi leh sakhua, vun rawng avanga inthliarna awm thin te paih bo a, rilru thianghlim pu chung a infiam a, intihsiak a, a chak apiang te ding chan na hmun chu infiamna buzawl hi a ni. A thianghlimin a fel fai tur a ni.
Infiamna hian ram leh hnam a suihzawm a, chi leh sakhua avanga in mihran tawh te pawh, tan zawng pakhat nei, lawm zawng pakhat nei, hlimna leh lawmna intawmin, tah leh rumna ruam a zawh chang pawhin, nghet tak a phuarkhawm fo tu chu infiamna khawvel hi a ni. Chi a thliar lo a, sakhua a thliar lo a. Inhre ngai lo te, tangrual ngai lo ten hrui khat an vuan a, theihtawp an chhuah fo thin. Kum sawmthum liam taah khan Mizo tlangval pakhat avangin India mipui tam tak an aurual dual dual a. India ram media house lian ten a chanchin ngaihvenin, a ziak hmasa tu, a thlalak ti chhuak hmasa tu ni tumin an lo um dul dul tawh a. Ni, khatih hun lai khan Mizo leh Mizoram hming hrim hrim hi national media ah a lailum a chang khat a. Mizo hming chu sawi loh, Mizoram hming hrim hrim pawh an ziak dik mawh em em a nih kha. MRF World Cup Boxing -1990 ah Mizo tlangval Zoramthanga khan Bronze medal lain, India boxing chanchin a lawmman a dawnna mellung a chhiar tanna hmasa ber leh hriatreng tawh tur a ni. Khawvel huap Boxing intihsiaknaa India tan medal la thei hmasa ber chu Mizo tlangval Zoramthanga a ni. Chhuanawm tak a ni. Khami hnu atang khan India mi tam takin Mizo an hria phah a, India ram a infiamna chanchin thar ziaktu tam takin Mizo hming ziah dan an hriat phah a, Mizoram chanchin pawhin ngaihven a hlawh zui niin sawi a ni.
Mizo mipa zinga vawiin ni thleng a Hockey vanga thleng sang leh sulhnu nei hraw ber chu Zomuana Ralte kha a ni awm e. Bangladesh ah a hming a chher a, a thih pawhin a kuang chu Bangladesh hnam puanzarin an khuh a, a chungah tiangkawm leh ball an dah a. Mi pawimawh tam tak takin thlahna pangpar an dah bawk. Khatih laia Bangladesh prime minister Sheikh Hasina meuh pawhin a ui thu sawiin “A thihna hi Bangladesh sports tan thawm that theih loh khawpa channa nasa a ni,” a ti hial a. Mizo pa pakhat a thihna chuan Bangladesh ram pum a nghawr nghing a, ram pumin lu an sun a. Jumma Lusai chu Zomuana Ralte a ni. Zomuana chu Zofate tihmingthatu leh Zo nih tinuam tu, hockey thiam hmingthang a ni a, state pakhat mai ni lo, ram pakhat mai pawh ni lo, khawvelah pawh a hun laia thiam pawl ni pha, hockey khawvel a hriat hlawh pha ngat a ni. Zomuana hian Bangladesh aiawhin hockey inelna sang ber ber a khel a, vice captain leh captain te hial a ni thei. Hockey ngaihsanna ram Bangladesh-ah “hockey raja” ti hialin an sawi.
Ram hrang hrang 140 ten an zawm leh an inziah luhna, field hockey a khawvel a thuneitu sang ber International Hockey Federation (FIH) chuan kum 2019 khan Mizo hmeichhe zinga Hockey lama thleng sang ber leh sang zawk la thleng zel tur a kal chho mek Lalremsimi chu FIH Rising Star of the Year lawmman a lo hlan thlap tawh. Khawvel huap chawimawna sang Mizo nula kut a hlan a ni ta mai kha a ropui tak zet. He chawimawina hi India hmeichhe zingah mi pathum chiahin an la dawng nghe nghe. Remsiami goal thun avangin India mipui tam tak an au dur dur fo reng a. Chhangte tlangval Lallianzuala chu All India Football Federation in Player of The Year atan a lo thlang fel dim diam tawh a. Lza hi Mizo a nihna leh a sakhua avangin hnawl ngawt theih a nilo a. A hlawhchhuah hlawhtlinna hi Mizo mai nilo, India mipui sang tam takin an lawmpui a, an hlim pui ta zawk.
South Korea khawpui -a Winter Olympic Games vawi 23-na hawnna inkhawmah khan infiamnain thil a tih theih zia lan tirin a lo awm tawh a. Ram inthenawm, thu buai hla buai nei reng, eng ngemaw hlek a indo inpeih at reng thin ram pahnih South Korea leh North Korea te chu Korean unification flag hnuaiah an rawn pen chhuak a, Won Yun-jong S.Korea) leh Hwang Chung-gum (N.Korea) ten unification flag an dawm dun a nih kha. Khatih hun lai khan New York Times chanchibu phei chuan “ Kum sawm chhunga ram pahnih te inpawm tawn lehna ropui ber” ti hialin a ziak nghe nghe a nih kha.
Kum tam tak chhung US khua leh tui te chu China ramah luh phalsak an ni ngai lo a. China sorkar chuan kum 1971 april thla khan US Table Tennis player te chu an rama exhibition match khel turin a sawm a, hei hi “Pingpong Diplomacy” tia sawi zui a ni.Tichuan, US Table Tennis player te pawh China ramah an han inkhel ta ngei a. Hemi hnu hian ram pahnih te boruak pawh a tha chhunzawm chho ta viau a a nih kha. Chumi hnuah khatih laia US President Nixon pawh kha China ah a han zin nghe nghe a. Mipui lawm a hlawh hle. Ram pahnih inkar boruak tha lo tih that lehna tur an hmanraw hman pawimawh hmasa chu infiamna lam kaihhnawih a ni tlat. Kum 2010 US Open ah khan India tlangval Rohan Bopanna leh Pakistan tlangval Aisam-ul-Haq Qureshi te tangdun chuan intihsiakna an hmachhawn a. India leh Pakistan chungchang chu sawi thui ngai loin kan hre vek a. Khami te inkhel en tur khan United Nation a Ambassador hrang hrang te pawh an thu ther fur a. Khatih lai khan India leh Pakistan chu an tangrual tlat a. Anmahni tantute au hla pawh induhsak tawnna lam a hawi a. Thil dang a tan dun thei ngai lo, ha aiah ha ti thak thak thin India leh Pakistan te chu infiamna buzawlah chuan an tangdun thei tlat lawi si. An hming lemah Indo-Pak Express tia sawi thin an ni.A hnu zelah pawh he mite thian dun hian au hla intawm “Stop War, Start Tennis” tih thupui hmangin campaign an nei zui ta nghe nghe a nih kha.
United Nations (UN) chuan infiamna hi remna leh hmasawnna thlentu, thiltihtheihna mak tak nei tih a hria a. Hei vang hian infiamna chu a thil tum tihhlawhtlin nan hmanraw tangkai takah a lo hmang fo tawh thin a. United Nations General Assembly, august ni 23, 2013 a neih chuan, modern olympic Athens a neih tan ni April ni 6 chu International Day of Sport for Development and Peace (IDSDP)-ah a lo puang tawh nghe nghe. Hei hi International Olympic Committee pawhin a pawmpui tawh a. United Nations chuan infiamna hian hmasawnna nghet leh awmze nei a thlen thei tih a pawm a. Chu mai niloin, remna leh muanna a awm theihna kawngah pawh a thawh hlawk tih a hrechiang a. Khawvel pum huap a remna leh hmasawnna ti chaktu pawimawh tak chu infiamna tih hi a hre chiang a. Retheihna umbo a nih theih nan te, remna leh muanna a awm theihna tur a hmalakna kawngah, infiamna chuan hmun pawimawh tak a chang chhunzawm chho ta zel a ni. Kum 2024 ah phei chuan United Nations chuan “Sport for the Promotion of Peaceful and Inclusive Societies” tih chu a thlang ta hial. Mimal leh pawl inpumkhatna atan te, ram leh ram inpumkhatna mai bakah, remna leh muannna thlen theihna turin a bul thut atanga a ler thlengin infiamna chu a hmanraw pawimawh ber a ni chho ta zel a. ni. United Nations hmalakna langsar tak pakhat chu Football for the Goals (FFTG) hi a ni.
Infiamna hian ram/ state economy thanlenna kawngah nasa takin a pui a. A zarzo tu zingah Mizo thalai tam tak an awm ve mek. Football bikah ringawt pawh Indian Super League & I League avangin Mizo footballer tam takin eizawnna mumal leh hlawk zawk an neih phah mek a. Tun season kal mekah phei chuan transfer market a Indian footballer hlutna an chhutah, Mizo tlangval pahnih te chuan pakhatna leh pahnihna an hauh nghe nghe. Chu chauh a nilo, Mizo infiam mi tam takin Services, Railways, Sports Control Board hrang hrang hnuaiah eizawnna an neih phah a. Khelmual chhung mai nilo, infiamna in a ken tel thil tam takah, infiam mi ni lem lo te pawhin eizawnna an nei mek. Tualchhungah MPL, MSL, PVL Cricket League etc hmangin infiam miten sum leh pai lakluhna theihna remchang an neih theih phah a. MI thenkhat phei chuan eizawnna nghet an neih theih phah hial a. Indian Super League chauh pawh thlur bingin, Mizoram economy a tha zawng a a khawih dan ziah thui a chakawm khawp mai. A tawi zawngin sawi ta ila, Mizo infiam mite sum thawhchhuahin Mizoram economy ah hmun pawimawh tak a luah a tih ngam zan mai. Mi thenkhatin state pawn lamah sum kan khawhral hiau hiau laiin, Mizo infiam mi te chuan Mizoram lamah sum an rawn rut haw hnawk hnawk ti ila, kan sawi sual awm lo e.
India sawrkar pawhin National Education Policy a tih chhuah tharah phei chuan infiamna chu kah phah tak leh thil dang tih kar a tih ve chauh tur a ngaih thin chu thlak danglamin, curricullar activities ah a puang ve ta hial a. Hnam puanzar kaih pharh a ngaih tawhna chin programme chu a te thei tawh lo a.Infiamna leh hnam puanzar a inzawm fo a. Thil tak tak leh urhsun tak a hun hmanna chu infiamna hi a ni tih a chiang – Infiamna hi thil tak tak a ni e.
Ziaktu : Hmingthansanga