Infrastructure rualin a kheltu hmasawnna pawimawh – VL Zaithanzama

MLA VL Zaithanzama chuan thalaite khawvelah sports hlamchhiah theih a ni loa, ram hmasawn leh hmasawn lo tehna atan sports chu tehfung pawimawh a nih tawh avangin ram changkang apiang sports-ah an sang zel tih a sawi a. “Kan mil tawkin infrastructure-ah hma kan sawn a ngai a, a pawimawh ber erawh a kheltu mihring hmasawnna tur kan ngaihtuah hmasak a ngai. Sports hi game-ah hmang loin game hmangin sports-ah hmasawnna thlen kan tum zawk tur a ni,” a ti.
New Capital Complex Khatla-a Basketball Court cheithar chu August 4 zan khan Aizawl West III bialtu MLA VL Zaithanzama hian a hawng a. Renovation hawnnaah hian YMA Branch-in section huap basketball intihsiak final khelh a ni. YMA Khatla Branch Basketball Court hi inkhelhna tlak a nih tawh loh avangin MLA Fund hmanga cheithar a ni.