Inhawng taka sawiho turin CentralYMA-in sawrkar leh NGHAM ngen

Inhawng taka sawiho turin Central
YMA-in sawrkar leh NGHAM ngen
Health care scheme thar hman chungchangah Mizoram sawrkar leh private hospital neitute chu inhawng taka sawiho turin Central YMA chuan a ngen a. A tul anga hma la turin an inpeih tih an hrilh.
Mizoram Universal Health Care Scheme (MUHCS) chungchangah Zirtawpni khan Central YMA hruaitute hian Health minister Lalrinpuii an kawm a. MUHCS-a sawrkar ruahmanna minister hian lo hrilhin, NGHAM nen an inkara hriatfiah loh awmte a sawi a, sawrkar chu biak theihin a inhawng reng a, mipuiin an tawrh lohna turin hma an la tih a sawi.
Central YMA hruaitute hian mipuiin an tawrh zel lohna turin sawrkar leh private hospital neitute chu inhawng tak ve ve chungin sawiho se, tiin an ngen a. Mipui tana tha ber ngaihtuaha hma la tura ngenin, a tul a nih chuan hma la turin a inhawng reng tih an sawi a ni.
CYMA committee sang, Central Executive Committee-in a rel tawh angin, health care scheme chungchangah Mizoram sawrkar leh Non- Government Hospital Association Mizoram (NGHAM) inremlohna avanga mipui harsatna tawh mek thlirin hruaituten hma an la a. July 4 khan private hospital neitu pawl (NGHAM) hruaitute an lo kawm tawh a ni.