Inthen leh Social Media engtin nge ni ang!

Inthen leh Social Media engtin nge ni ang!
Kan mimal nun te pawh social media-ah kan tarlang nasa tawh hle a, kan ngaihzawng/kawppui te nena kan inthen hian social media, a bik takin Facebook chu a tibuaithlaktu pakhat a ni ve ta tlat. I ‘ex’ chu engtin nge i tih ang, inthen tawh mah u la ani kha social media atangin a pilbo dawn tihna a ni bik si lo.
In inthen a, inhmuh loh i duh a, in biakpawh loh i duh ang, a chanchin hriat zui i duh lo va, i chanchin pawh hre bik lo se i duh bawk. mahse, Facebook-ah thian inang in ngah si, tagged memories leh Facebook ‘life events’ nen a buaithlak khawp mai. Engtin nge i tih tak ang?
Kan rilru a na a, tichuan kan ‘ex’ chu social media atang pawhin paih bo daih kan duh a, a âwm viau. Mahse, relationship counsellor leh therapist Dr Kashissh Chhabriaa chuan, “I ex chu engtianga rei nge i pumpelh theih ang? Khawvel zim takah kan cheng a, tunlai khawvelah chuan social media atanga unfriend emaw delete emaw kha chu a naupangchhia tawh hle a ni,” a ti.
Chhabriaa chuan ngaihzawng hlui te Facebook atanga delete emaw block emaw chuan engmah a siamtha chuang lo niin a sawi a, siamthat a hnêkin boruak a tichhe lehzual zawk thei niin a sawi. Facebook atanga in-delete chu a na mah mah tawh a, chuai chuan a him chin atanga inthlir mai a tha zawk a ni.
In thian thuhmun ten thlalak hlui, in-romantic deuh lai te an rawn post thar leh a, an tag che a nih pawhin, polite takin in-untag mai la, chuan private message polite taka thawnin thil awmzia hriatfiah mai tur a ni.
I ‘ex’-in thlalak a post leh a thu post reng reng comment tum lo la, a thil post reng rengah khan engmah lo ti ve duh suh. I duh loh zawng a post a nih pawhin ngawihsan mai mai tur a ni.
Thil pawimawh taka Facebook-a mi zawng zawng hmuh theih tura ‘ex’ te tana hmuh nuam lo tur post hi tih loh tawp tur a ni. Chutiang thil chu a lo thleng palh a nih pawhin a boruak ti chhe zual tura chhan let ve kher a tul lo. A zah ve ram ramna turin kan ti let ve teh ang, tih ngaihtuah mai te pawh a awl khawp ang, mahse, chutiang chu pumpelh tur a ni.
I ‘single’ tih pawh khan tlangaupui nghal chiam chiam a tul chuang lo a nia. I thlalak post lo danglam ta te, i ‘ex’ thlalak a lang ve ta ngai lo te kha miin an hrethiam vek dawn tho.