Inkahhai puan hnuah Israel-in Beirut dai bei leh

Israel chuan kar liam taa US-in a duan zul zuia inkahhai an puan hnua a vawi khat nan Lebanon khawpui, Beirut chhim lam dai a bei leh.
Lebanese state news agency chuan Iranian-te thlawp Hezbollah kulhpui, apartment building pahnih chu thlawhna hmangin vawi hnih an an kap a, mi pahnih an thi a, mi 17 an hliam bawk.
Prime Minister Benjamin Netanyahu-a chuan Israel chuan ‘Beirut-a Dahieh district-a firfiakte hmunpui a bei a, hei hi Hezbollah-in Israel ram a kah chhanna atan a ni’ tih a sawi a. Hezbollah hian engmah a la sawi lo.
Israel chuan US nawrna hnuaiah Beirut beihpui thlakna chu a tikhawtlai tawh a. Washington hian beihpui thlak a nih chuan Iran nena inremna siam an tum a tibuai thei niin a ngai a, Iran hian US nen inremna an siam a nih chuan Lebanon-ah pawh inkahhai famkim awmtir tum tlat a ni.
Pathiannia Israel chetnaah hian chenna in pakhat chhawng hnuai lam a chhe vek a, a hnuai lam kawngpuiah chuan concrete leh thir lam chi a darh nuaih bawk.
Social media-a video darhah chuan miin hliam tuarte pui tura an tlan lai a lang.
Israeli sipai, Arabic tawnga thupuangtu chuan X-ah ‘Hezbollah firfiak hmunhma’ beih a nih thu a tar lang a, la beihpui chhunzawm tur a nih thu a sawi bawk.
Israeli sipaite chuan Lebanon atanga Israel chhunga thil thlawh luhtir pahnih an lo dang tih an sawi a. Hezbollah chuan an kah a ni tih an la pawm lo.
Iranian parliament-a foreign policy leh national security committee thupuangtu, Ebrahim Rezaie-a chuan Israel-in Beirut a beih chungchangah ‘thutlukna siam leh na taka chhan let’ a tiam.
Nilaini kal taa inkahhai a nih hma khan Israel hian Dahieh-a beihpui thlak chu tihlenah a lo vau tawh a, mi tam tak an tlanchhia.
Lebanon hi March 2 khan indonaah hian hruai luh a ni a, Hezbollah hian Iranian Supreme Leader tihhlumna phuba lak nan Israel chu rocket hmangin a kap a. Israel hian Lebanon ram pumah thlawhna hmang leh chhim lamah leia beihpui thlakin a chhang let a, indona a chhuak ta a ni.
April 17 atang khan a hming chauhvin inkahhai puan a ni a, ram pahnihte hian an bawhchhe nasa hle.
Israel hian kartawp khan an ram chhim lam chu thlawhna hmangin a bei nasa a; mahse, Pathiannia beihpui thlakna hi inkahhai a nih hnua khawpui beih vawi thumna a ni a, a hmasa pahnihah hian Hezbollah commander-te beih a ni.