Inkahhai puan kara Israel-in Lebanon a kahah mi 10 thi
Inkahhai puan a ni mek chungin Israeli-ten van sang atanga Lebanon khawchhak lam an kahnaah mi 10 vel an thi niin Lebanese thineituten an sawi.
Israeli sipaite chuan Bekaa Valley-ah hian Shia Muslim leh hel pawl, political party ni bawk, Hezbollah hmunhmate an kap tih an sawi ve bawk a, heng lai hmun hi an pawl tamna lai a ni.
Hezbollah hian a field commander hlun pakhat telin an mi leh sa pariat an thi niin an sawi.
Tun tum hi November, 2024-a Israel leh Hezbollah indo titawpa inkahhai puan a nih hnua Israeli-te chetna avanga thi a tam leh ber tum a ni.
Inkahhai hi puan ni ve bawk mah se thla 13 liam ta chhungin ni tin deuh thaw Israel hian Lebanon-ah hian beihna a thlen a ni.
Zirtawpni zana an chetna nia sawi thlalak darhah chuan mihring khawsakna veng ni ngeia lang hmunte chu a chhe nasa hle.
Israeli sipaiten thuchhuah an siamah chuan ‘Hezbollah command centre’ an bei a, a pawl hi civil mite hmunah an inkulh thin niin a tar lang a. An thil tih dan chu ‘Israel leh Lebanon inkara inhriat thiam tawnna siam’ bawhchhiatna chiang tak niin an sawi bawk.
UK, US leh ram dang eng emaw zat pawhin firfiak pawla an chhal, Hezbollah erawh chuan inkahhai hi Lebanon chhim lam, Litani lui leh Lebanon leh Israel inrina atana official lem lova hman, Blue Line inkarah chauh a ni tih an sawi.
Israel nen thla 13 an indo a tawpa inkahhai puan a nih khan a thawh khatna chhungin Hezbollah-ten ralthuam an lek zui tawh loh nan Lebanese sipaiten an pawlin hmunhma an hmante an thiahsak nasa hle.
Hetih lai hian an pawl chuan Lebanese thuneituten ralthuam chungchanga inbiak an rawtna chu an hnar zel rih tih an sawi a, heng zingah hian an ralthuam an chhek tamna ber nia hriat, Bekaa Valley pawh a tel.
Kar kal ta khan Hezbollah hian sorkarin ralthuam an lek tawh lohna tura Litani hmar lam leh lawngchawlhna khawpui, Sidon awmna, Awali lui hmar lama ruahmanna thawh hnihna kalpui an rawt pawh an lo hnawl leh tawh bawk.
Lebanese sorkar chuan Israel chet dan chu inkahhai inremna bawhchhiatna nia sawiin ram dang hruaitute chu titawp tura nawr turin an ngen.