Iran-ah sorkar duh lohna lantirin zirlaite pungkhawm

Iran zirlaite chuan an ram sorkar dodalna lantir chhunzawm zelin inrinni khan nawrh an huaihawt leh a, an ram hruaitute laka thinrim kalkhawm an ni ber niin a hmuna awm thuthar thehdarhtute chuan an sawi.
Zirlai kalkhawmte hian an ram hruaitute chuan khawvel mila inher rem ve tura an duh thu aupuiin, Iran nuclear programme pawh a tul chuan tihtawp rih nimai se an duh thute an aupui a, buaina leh indona chhuak lova awm an duh thu bakah, sorkar pawh ngaihtuahna hmang fimkhur tura an duh thu an tlangaupui nasa hle.
Thla hmasa lawk khan zirlaite nawrh huaihawtna avangin Iran zirlai sang tam takin nunna an lo chan phah tawh bawk a, khawthlang ram hrang hrangte chuan nuclear programme kalpui lo tura Iran vau bawkin, US president Donald Trump pawhin a lo vau tawh bawk.
Tun hnai khan US leh Iran hi Oman-ah inremna siam theih dan turin an inbe leh a, an inbiakna thu hi US chuan a puanzar loh bakah, an inbiak hnu lawk hian sipai leh indo thlawhna bakah ralthuam thahnem tak Iran hnaihah a chhawp thung.
Iran buaina hi December thla khan sum lama harsatna avangin a lo chhuak tawh a, an ram security force te chuan tharum hmanga mipui tam tak bei zuiin, khawvel a nghawr nghing a, tunah zirlaite lo pen chhuak velehin mi sang tam takin nunna an chan zui tawh bawk a, US chuan remna zawnpui tumin theihtawp a chhuah reng bawk niin reporter thenkhat chuan an sawi.