Inkahhai rawt hma lawka Russia-in Ukraine a beihnaah mi 20 thi

Moscow leh Kyiv-ten a hrana an inkahhai rawtna an siam hma lawk, Thawhlehni khan Ukraine hmun hrang hranga Russia-in beihpui a thlaknaah mi 20 vel an thi.
Volodymyr Zelensky-a chuan Russian glide bomb eng emaw zat hmanga Kramatorsk khawpui lailia kahnaah civil mi panga an thi tih a sawi a, Zaporizizhia khawpui thuneitute chuan Russia-in van sang atanga a beihnaah mi 12 an thi tih an sawi bawk.
Russia-ah Chuvash Republic-a thuneituten Thawhlehni tuka drone hmanga beih an nihnaah mi pahnih an thi a, mi 32-in an hliam niin an sawi ve bawk.
Thawhlehni khan Russia leh Ukraine hian Zirtawpnia Soviet Union-in Nazi Germany a hnehna puala Russia-in hriatrengna hun a buatsaih hmain inkahhai an puang.
Russia chuan May 8 leh 9-ah inkahhai a huaihawt tur thu a sawi a, Ukraine-in inkahhai puan a bawhchhiat chuan Kyiv laili chu ‘missile hmanga nasa taka beih’ a nih tur thuin a vau bawk.
Kyiv erawh chuan May 6 zanlai atangin inkahhai a zawm dawn tih a puang a, heta tang chuan Ukraine chu ‘beihna tawh phu ang chhan letna’ pein a che dawn tih a puang.
Inkahhai pahnih hi a hran ve vea puan niin a lang a, eng ang inkahhai nge, a rei zawng leh tute nge kengkawh dawn tihah an inrem lo tihnaa ngaih a ni.
Zelensky-a Chief of Staff Kyrylo Budanov-a chuan Ukrainian president hian inkahhai puan chu ‘kan zawm chhunzawm zel ang… A bak chu Russia-in a tih tur a ni’ tiin a sawi niin a sawi.
Zelensky-a chuan Russia chu ralthuam dah tura ngenin ‘indawr tak takah kal turin’ a ngen.
Ukraine-in inkahhai a puan hi Zelensky-a tan chuan a ramin inkahhai puan a duh thu leh a bawhchhiatna eng pawh Russia-ah chetna a ni tih a lan theihna tur a nih a rinawm.
Telegram-ah, “Eng anniversary ‘lawm’ emaw aiin mihring nun hi tehkhin rual lohin hlutna a nei zawk niin kan ngai,” tiin a ziak.
Thawhlehni zanlai (India-a zing 03:30)-a ama puan inkahhai kalpui hmain Ukraine hian Russia chu thlawhna hmangin a bei nasa hle a, Leningrad biala Kirishi-a industry hmun leh Chuvash Republic-a Cheboksary-a sipai thil siamna hmun a kap bawk.
Zelensky-a chuan ram chhunga siam, Flamingo cruise missile hmangin ramri atanga km 1,500 vela hla, cheboksary factory beih a nih thu a sawi a. Video darhah pawh puak nasa tak a lang.
Russian defence ministry chuan a hnuah Ukrainian Flamingo paruk leh drone 601 an kah thlak thu an sawi.
Thawhlehni tuk khan Russia-a thlawhna tumhmun eng emaw zat khar lailawk a ni a. A hnuah Moscow Mayor Sergei Sobyanin-a chuan khawpui bul hnaiah drone eng emaw zat kah thlak a nih thu a puang zui.
Kremlin chuan Victory Day hmain beih hlauhna a nei a. May 9-a Soviet Union-in Nazi Germany a hnehna lawmna hi kum 2000 chhoa Vladimir Putin-a rorelna a intan atang khan a lian zel.
Kuminah erawh Kremlin chuan Red Square-a sipai parade neih tur chu Ukraine atanga ‘firfiakte hlauhawm’ vangin tihtlem a nih tur thu a sawi a, sipai hmanruate pawh pho chhuah a ni dawn lo tih a sawi.
Muscovite-te pawh May 9 hma hian ni eng emaw zat chu mobile internet hmanna tibuai emaw, tihtawp emaw a nih tur thu an hriattir bawk.