Inleitlin ngawt a theih tawh loh – ZPM leader

Inleitlin ngawt a theih tawh loh
– ZPM leader
Serchhip by election leh Lunglei Municipal inthlanah suma inleitlin ngawt a theih tawh loh tih chiang taka a lan thu ZPM leader Lalduhoma chuan a sawi.
Tuivawl Block ZPM Conference vawi 7-na Thawhlehnia Sakawrdaia neih a hmanpuinaah Lalduhoma nawmsak hmasak a, reilote chhunga hausak thur thur tuma politics kan khelh chhung chuan kan ram a chhe zel dawn a, sawrkar official leh mipui mimir pawh rinawm hleithei loin min siam mek, tiin a sawi. “A langin sum leh pai hmangin vote kan zawng a, chuti chung chuan neih engmah nei lo ZPM candidate te Serchhip leh Lungleia LMC inthlanah thlantlin kan ni. Hei hian sum hmanga inleitlin ngawt a theih tawh loh a ni tih chiang takin a tilang a, a lawmawm takzet,” a ti.
Kan ram leilung kan enkawl that loh vangin hliam a tuar mek a, kan leivung paih dan mumal loh avangin chhiatna kan tuar mek a, kuthnathawktute manganna hial a thlen ta tih Lalduhoma hian a sawi. “Fur kan thleng leh dawn a, kan leivung paih mai mai hian eng ang takin nge nghawng a neih ang tih sawi har tak a ni. Rilru thar, ngaihtuahna thar pu chungin he ram tan hian ke pen ang u,” a ti.
Pathian leh mipui zara sawrkarna an chan chuan Sakawrdai chu kawtchhuah pawimawh tak, an ngaih pawimawh hle tur a ni tih a sawi a. Sinlung Hills Development Council-in dan mumal tak a nei ta chu a lawmawm rualin, kan dan neih erawh a nihna tur anga hman a la ni lo tih a sawi. ZPM a sawrkar chuan sawrkarna chelhtu leh Hmar mipui chu pumkhata awmin, pawl pawl awma kalna chu tihtawp a ni anga, Aizawla Council office awm pawh Sakawrdaiah sawn a ni dawn tih ZPM hruaitu hian a sawi bawk.