Kan chhungkua kan dam em tih
inzawh fo a tul – TJ Lalnuntluanga
Chhungkua a dam hmasak phawt hian ram leh hnam a dam chauh thin a, kan chhungkua kan dam em, tih chu inzawh fo a tul tih minister TJ Lalnuntluanga chuan a sawi.
MHIP Hringlangtlang Block chuan Thawhlehni khan Mualkawiah an conference hmasa ber an hmang a. He hun hmanpuitu Champhai South bialtu MLA ni bawk TJ Lalnuntluanga chuan hmeichhiate chu chhungkua, khawtlang leh ram leh hnam innghahna lungphum pawimawh tak an ni, tiin, nute chu chhungkaw khaidingtu leh a laimu pawimawh ber, chhungkaw kal zel dan tur chu an kutah thui tak a innghat tih a sawi. “Chhungkaw hlimin khawtlang, kohhran leh ram dinhmun thlengin a chawikang thei. Kan chhungkua kan dam em, tih inzawh fo a tul a, chhungkua a dam hmasak phawt hian ram leh hnam a dam chauh thin,” a ti.
MHIP member-te chu pasal fanaute ngaihsak a, nunkawng hrisel leh tha zawm thei tura pui a, chhungkaw hlim leh rinawm din tura zirtirna tam zawk nei turin a fuih a. Midang tana phut let nei loa hna an thawh thin chu chhawmnung zel tur leh, mite thil tihah buai mai loa, ram leh hnam dam nana phut let nei loa thawk thin turin a chah.
Hringlangtlang Block MHIP hi 2022 June 24 khan Sub-Hqrs. MHIP Champhai hnuaia Block 3-na a ni a. An hnuaiah hian Branch 8 – Mualkawi, Melbuk, Hruaikawn, Buang, Khuangleng, Bulfekzawl, New Hruaikawn leh Dilkawn Branch awmin, tunah hian member 1363 an awm a ni. Din a nih atanga vawiin thlengin tanpui ngai mi 33 an tanpui tawh a ni.
Kan chhungkua kan dam em tih inzawh fo a tul – TJ Lalnuntluanga
Get real time updates directly on you device, subscribe now.
Prev Post