Inpeih lo chungin inthlan inpeih

Lai Autonomous District Council (LADC) inthlan vote thlak a hnai a, campaign hun pawh a tawp tawh. Political party-te an la inpeih lo a, mahse hunin a daih lo!
Political party-te hi an duh angin an campaign hman lo a ni hran lo a, tun aia liana thang tura campaign an la mamawh tih an inhria a ni ber ang.
LADC inthlan lo awm turah hian tute nge tling ang tih hi rin thiam a har an ti a, campaign hun tawp thlengin sorkar tur chiang taka sawi ngam a har tih chu inthlan thlirtute sawi dan a ni. Hei hi political party-te hmuh dan pawh a ni tlangpui a, campaign hun an khawpkham lo hlawm.
Lawngtlai atanga thu dawn danin, tun tum inthlan hi thlir thiam a har a, vote thlak ni thlengin thil a danglam thei. Tu party tan mah sorkar tur thawka thawk ngam chi a ni rih lo.
“Party lian ber chu an awm ngei a, mahse a tling tam ber pawhin mahnia sorkarna khawp MDC an nei lo thei a, chutiang chu tuna a lan dan chu a ni rih. Thil a danglam thut thei tho a, mahse mahnia sorkar thei an awm a nih pawhin sorkar thei tawk tawk a ni ang a, vanneih a ngai tel ang,” Lawngtlai-a chanchinbumi pakhat chuan a ti.
LADC-ah hian MDC bial 25 a awm a, ZPM-in bial 25, MNF-in bial 20, Congress party-in bial 14, BJP-in bial 10, independent ticket-a chuh mi 11 an awm.
Thawhtanni thleng kha chuan party mala sorkar thei an awm aiin an awm loh rinna a lian zawk rih a, mahnia sorkar thei an awm a nih pawhin vanneihna a tel a ngai ang an ti. Independent ticket-a dingte zingah tling tura ngaih an awm bawk a, an hawi lam a pawimawh thei dawn. Chutiang chu an dinhmun a nih avangin vote thlak turin party-te an la inpeih lo a, campaign tawp ni-ah pawh thahnem an ngai hle.
Vote chhiar zawhah pawh “campaign” hun a la inhawng turah ngaih a ni rih a, sorkarna siam tura indawr kual a ngai turah ngaih a ni. Chutih rual chuan party mala sorkar thei pawh an awm thei ang tih rin dan pawh a awm tho a, mahse vote thlak dawn hnaih leh vote thlak nia thil inlumlet a awm a ngai ang an ti.