Frankie Zonunmawia
-- Advertisement --
Indian Supreme Court Judge ni thin V. Ramaswami chanchin leh kan tunlai thil thleng hi a inhmeh riau mai a. Amah hi India rama SC Judge impeachment motion move- khum hmasa ber a ni. SC Judge a nih hma hian Chandigarh High Court Justice a ni bawk a. Supreme Court-a a kaisan hnu hian Chandigarh-a a lo khawsak tawh dan chuan a rawn umzui ta a ni.
Kum 1990 khan Chandigarh HC Justice a nih laia a khawsak dan chuan a rawn umzui ta a. A quarter chu a chei (renovate) nia insawiin sawrkar sum a lo seng nasa em em mai a, chhui zui a ni ta a ni. A quarter furniture (Sofa set, Dawhkan, Air conditioner pariat (8), bathroom accessories, choka bungbel leh inchhung cheina dang tam tak tiamin) cheng 8,00,946 (Nuai 8 leh tlem) zet a seng a. A phone bill pawh thla 1-ah cheng nuai 9.10 zet te a ni. Madras-a chawlh hman nan sawrkar motor a keng a, a la hawn leh lo zui a, Assistant Registrar chu thlawhnaa thlawkin car la let leh tur ringawtin a tir bawk a ni.
Hetiang hnu pawr tak a neih avang hian a ban theitu Parliament-ah a chanchin ngaihtuah a ni a, ban tura motion put luh a ni ta hial a ni. Mahse amah hi south Indian a nih avangin Congress chuan south lam tih vui hlauvin vote an thlak lo va, ban (impeached) a ni ta lova, hna pawimawh erawh thawhzui tir a ni ta lo a ni. A khaw lamah chuan a zam vak lem lova,a ban hnu hian MP election-ah te dingin a chak ta lo thung a ni.
Cheng nuai 8 zet mai mimal quarter chei bawlna atana hman hi Parliament-a mipui house; Lok Sabha-ah meuh banna motion putluh a nih chhan hi thil pakhat a awm a. Corruption anga han charge theih si loh, sawkar sum ei hek tak si a ni a. Mipui laka mawhphurtu leh mipui rawngbawltute hi an rank a san poh leh an mawhphurhna a sang a, entawn tlaka an nun a tulzia an tih lanna leh an zilhhauna pakhat a ni. Inrenchem tulzia sawi reng sawrkar tan phei chuan, hetianga sawrkar sum seng hiau hiau mai mi an zinga an awm a nih chuan, Indian history atanga inzir fing tawh mipui (informed citizen) te hmai zah avang tal pawh hian inzilhhau ve an ngai mai awm e.